Policia ka dhënë detaje se si u dhunua sot biznesmeni libanez Fadi Mitri, i cili do të ndërtojë një resort turistik në Gjirin e Lalzit
Sipas policisë, gjithçka ka nisur për shkak të një aksidenti.
Në kryqëzimin e Laknasit me rrugën e Rinasit, janë përplasur dy mjete, tip “Volkswagen” dhe “Mitsubishi”.
Pas kësaj përplasje ka patur një konflikt mes personave që udhëtonin me 2 makinat.
Për pasojë është lënduar nga dhuna dhe u dërgua për ndihmë mjekësore shtetasi E. M drejtues mjeti, si dhe biznesmeni libanez Fadi Mitri.
Drejtuesi i mjetit “Volkswagen” së bashku me pasagjerët, të dyshuar si ushtrues të dhunës, janë larguar nga vendi i ngjarjes.
Shërbimet e policisë dhe grupi hetimor po punojnë për identifikimin dhe shoqërimin e personave të tjerë të përfshirë në aksident dhe me pas në aktin e dhunshëm, për sqarimin e plotë të rrethanave të ngjarjes dhe vënien para përgjegjësisë ligjore të agresoreve.
Ndërkohë, biznesmeni, i cili ka edhe nënshtetësi amerikane, ndodhet i shtruar në një spital privat. Fadi Mitri është vizituar në spital nga disa ministra, si Ilir Beqja, Milva Ekonomi, ish-ministri Ilirjan Celibashi, etj.
