Partia Demokratike ka hapur një portal ku mund të ankohen të gjithë maturantët që nuk janë regjistruar në universitete.
Deputetja e PD-së, Jorida Tabaku në një postim në faqen e saj ne Facebook, pasditen e së mërkurës, sjell në vëmendje rastin e një maturanteje me mesatare të lartë që nuk ka fituar asnjë fakultet në universitetet publike.
“Elda Xhani ka mbaruar gjimnazin “Sami Frashëri”. Me mesatare te tre viteve te shkollës 9.2 dhe mesatare te Akp 8.92. Ka aplikuar në degët: Finance UT; Ekonomiks UT; Drejtësi UT; Gazetari UT; Sociologji; Fakulteti i Shkencave Sociale; Financë Bankë UET, Jurist i Përgjithshme UET, Marrëdhënie Ndërkombëtare UET dhe Psikologji UET”, shprehet Tabaku.
Në vijim Tabaku pohon se kjo studente me një mesatare të lartë ditën e djeshme zbuloi se Ligji i Arsimit të Lartë dhe paaftësia e qeverise i ka hequr të drejtën për të vazhduar studimet e larta. “Ndërsa ditën e sotme studentet dëgjuan një përgjigje që nuk jepte asnjë zgjidhje nga ministria Nikolla e cila është e zellshme në emërime partiake por jo zgjidhje problemesh. E vërteta e Ligjit të Arsimit të Lartë sapo ka nisur të bëhet e dukshme, ndërsa fajtorët vazhdon t’i lajë duart me fatin e të ardhmes së vendit. Denonconi raste te tjera tek http://www.pd.al/trego-rastin-tend/!”, thekson Tabaku.
