Drejtoria e Përgjithshme e Metrologjisë dhe Kalibrimit duhet të ashpërsojë ndëshkimet ndaj bizneseve që abuzojnë me peshën. Kontrolli i Lartë i Shtetit ka kryer një inspektim në DPM për periudhën 2013-1015 dhe ka konstatuar se nga mosveprimet e këtij institucioni është abuzuar me konsumatorët.
“Mbrojtja e konsumatorëve shqiptarë nga abuzimet me peshën dhe matjen nuk është në nivelin e kërkuar bashkëkohor, pasi performanca e DPM-së ka shfaqur mangësi për shkak të kuadrit rregullator të papërputhur plotësisht me direktivat e BE-së dhe të paharmonizuar mirë me aktet e tjera ligjore e nënligjore”, thuhet në raportin e Kontrollit të Lartë të Shtetit.
Sipas raportit, nga menaxhimi joefiçient dhe joefektiv i burimeve njerëzore; nga mospërfshirja në verifikimin e instrumenteve matëse të fushave me rëndësi jetike për popullsinë, si atë të shëndetësisë, mjedisit, komunikimit telefonik, sigurisë publike etj., u është sjellë dëm konsumatorëve.
Ndërsa, për shkak të mungesës së bashkëpunimit me institucionet e tjera publike për përfshirjen në verifikim të të gjitha subjekteve me instrument matës në përdorim, nga problematikat e licencimit, monitorimit dhe inspektimit të personave të autorizuar në fushën e matësve të energjisë elektrike dhe të ujit; nga veprimtaria inspektuese jo e qëndrueshme; si dhe nga mangësitë e konstatuara në fushën e kryerjes së investimeve dhe përdorimit të aseteve, është dëmtuar konsumatori.
Rekomandimet
Kontrolli i Lartë i Shtetit i ka lënë 39 detyra Drejtorisë së Përgjithshme të Metrologjisë dhe Kalibrimit që duhet të realizohen maksimalisht deri në vitin 2017.
“Inspektimi metrologjik të rrisë forcën ndëshkuese dhe penalizuese ndaj subjekteve që përdorin instrumente matëse jashtë kritereve teknike dhe ligjore, duke rritur nivelin e sigurisë së konsumatorëve për saktësinë e këmbimeve tregtare”, thuhet në raport.
Sipas raportit të KLSH-së, DPM-ja duhet të marrë masa për evidentimin, saktësimin dhe çregjistrimin e instrumenteve matëse në përdorim në vendin tonë, duke krijuar databazën kombëtare për këtë qëllim, në funksion të rritjes së efektivitetit të veprimtarisë metrologjike ligjore, dhe për pasojë mbrojtjen e konsumatorëve.
KLSH-ja rekomandon që DPM-ja dhe Sektori i Parapaketimeve, të marrin masa për evidentimin, regjistrimin dhe verifikimin e subjekteve prodhuese të parapaketimeve që ushtrojnë aktivitetin e tyre në vendin tonë; të rrisin bashkëpunimin dhe koordinimin e kësaj veprimtarive me DML-në, e shoqëruar kjo me ndryshimin e rregullores së brendshme për të saktësuar detyrat e tyre, duke synuar rritjen e efiçencës dhe efektivitetit të veprimtarisë verifikuese dhe monitoruese të parapaketimeve, për mbrojtjen e konsumatorit.
“DPM-ja të zbatojë me rigorozitet kuadrin rregullator për pajisjen me autorizim të personave juridikë dhe fizikë për verifikimin e instrumenteve matëse, duke respektuar afatet, ngritjen e komisioneve vlerësuese me specialistë përkatës, dokumentimin e gjithë kësaj veprimtarie dhe vlerësimin e raporteve përkatëse për dhënien e autorizimit jo vetëm për transparencë të institucioneve publike, por si pikënisje për mbrojtjen e konsumatorëve nga abuzimet me matjet”, thuhet në raport.
Sipas KLSH-së, DPM-ja dhe DML-ja, dhe Sektorët e Shërbimit, të rrisin bashkëpunimin me Drejtoritë Rajonale të Tatimeve, QKR-në si dhe me njësitë e qeverisjes vendore, për të identifikuar dhe kryer verifikimet metrologjike në subjektet e reja të hapura, që ushtrojnë aktivitet tregtar apo shërbimi për të përdorur instrumente matëse ligjërisht të kontrolluara, duke evidentuar dhe përditësuar regjistrat me instrumentet dhe subjektet e reja, të cilat ushtrojnë aktivitetin e tyre në vendin tonë.
