Agjencia turistike “Saimir Tahiri” u ka dhuruar të martën pjesës më të madhe të gazetarëve të kronikës së zezë një udhëtim ekzotik në fushat me cannabis në zonën e Skraparit dhe Ersekës. Gazetarët ishin shumë të lumtur nga ky udhëtim. Nuk dihet nëse e kishin nga hipja në avion apo nga aroma e kanabisit BIO që gjendet me shumicë në çdo cep të Shqipërisë
Të hipur në një mjet fluturues të Policisë së Shtetit, reporterë dhe operatorë të televizioneve kryesore të Tiranës jane nisur paradite për të parë një ditë pune të forcave speciale në korrjen e lëndës narkotike që ka zaptuar vendin.
Makineria e propagandës së Ministrisë së Brendshme po shfrytëzon kapacitetet e vogla të televizioneve, për të verifikuar vetë gjendjen e parcelaclve në terren.
Nga ana tjetër, gazetarët që raportojnë cdo ditë mbi asgjesimin e cannabisit, po e shfrytëzojnë këtë udhëtim turistik për të realizuar foto selfie në fushat me lëndë narkotike, të cilat me pas provuan drapërin e policisë.
Mentor Kikia, kryeredaktor i lajmeve në Top Channel, por edhe analist i pavarur, shprehet i dëshpëruar për atë që mund të konsiderohet si vetë-përdorim i reporterëve nga zyrat e propagandës. Në një koment në facebook, ai u rikujton gazetarëve se nuk duhet të presin furgonin e policisë për të parë fushat me cannabis. Sipas tij, gazetarët duhet të ishin të parët që të investigonin situatën në terren dhe të vinin në lëvizje strukturat policorë.
Ky koment i Kikisë ndoshta nuk është lexuar ende nga kolegët gazetarë që vijuan udhëtimin në “kopshtin botanik kriminal”, duke e shoqëruar me foto ku shfaqen të lumtur dhe të gëzuar.
Në çdo situatë normale, gazetarët do të ishin të parët që do të jepnin alarmin dhe do të shprehnin shqetësimin për gjendjen e drogës në vendin tonë.
Por, si shumë gjëra në Shqipëri, të cilat nuk qëndrojnë në vendin e tyre, edhe roli i pjesës më të madhe të reporterëve të kronikës së zezë, nuk është aty ku duhet. Ata u bënë palë me Ministrin e Brendshëm i akuzuar për kontrollin e kabanisit që ka mbuluar mbarë vendin.
Gazetarët pranuan të bëjnë PR e Tahirit pikërisht në kulmin e debateve për përfshirjen e drejtuesve të lartë të policisë në mbrojtjen e parcelave me hashash. Kjo e konfirmuar edhe nga shërbimi inteligjent në një raport sekret që i ka dorëzuar pak ditë më parë Porkurorisë së Krimeve të Rënda.
Vizita e kësaj të marte në “fushat e blerta” i bën rivalitet emisioneve historike të Televizionit Publik Shqiptar, “Hapësirë e blertë”. Pak ditë më parë, për disa xhiro me skaf policie në jug të vëndit, gazetarët e kronikës ndoqën hap pas hapi “shown grotesk” të Policisë së Shtetit me panairet në Vlorë, Himarë e Sarandë.
Gazetarët pranuan të kalonit mbrëmjet në clubet e rezervuara nga Ministri i Brendshëm dhe zyrtarët e tij duke lëvizur me furgona policie. Shumë prej tyre kanë pranuar se zbrisnin nga furgoni i policisë përpara lokalit ku duhet të shkonin nga turpi se dikush do i shihte. E megjithatë pranuan të “shijojnë” një fundjavë të paguar s’dihet nga kush me shëtije me skaf e clube nate ku alkoolin duhet ta pije me detyrim, ndryshe Ministri i Brendshëm të “gjobiste” nëse e kishe gotën ende plotë.
Krahas “blerjes së medias” nga ana e agjencive qeveritare, lëvizjet e fundit të Ministrisë së Brendshme me sponsorizimin e udhëtimeve turistike të gazetarëve, duket se kanë qëllim të mpijne nervin kritik.
Duke parë fytyrat e qeshura të kolegëve gazetarë tek selfitë e tyre në parcelat me hashash, kuptohet lehtësisht se qëllimi është arritur.
Ndoshta ata shërbejnë edhe për të rritur interesimin e turistëve të huaj në këtë drejtim….
