Para dy ditësh policia e Durrësit vuri në pranga 29-vjeçarin Alfred Skonja nga Fushë-Kruja, pasi dyshohet se prej një jave ka ndjekur një biznesmen nga qyteti bregdetar për ta ekzekutuar.
“Ndërhyrja në kohë e bluve ka parandaluar krimin, ndërsa është shpallur në kërkim dhe bashkëpunëtori i të riut”, thuhej para dy ditësh në njoftimin për shtyp të policisë së Durrësit.
Ndërsa sot, Boldnews.al zbulon kërkesën e paraqitur nga prokuroria në rrethin gjyqësor të Durrësit ku thuhet se Alfred Skonja akuzohet për vjedhje dhe jo siç pati njoftuar publikisht para dy ditësh policia e Durrësit se ai akuzohej për vrasje.
Bazuar njoftimit të policisë para dy ditësh ku provat akuzonin 29 –vjeçarin nga Fushë-Kruja se kishte planifikuar vrasjen e një bizesmeni kuptohet se policia ka luajtur bllofin kur i tha publikut se kishte arrestuar një vrasës me pagese pasi që në momentet e para e dinte që bëhej fjalë për një vjedhje.
Në vendimin e Gjykatës së Durrësit për 29-vjeçarin thuhet se ai u arrestua duke shkuar pranë një automjeti që ishte në vëzhgim nga policia. Automjeti ishte i vjedhur në Fushë-Krujë dhe policia nuk e ka zbuluar ende se si përfundoi ne zonën e Ishmit në Durrës.
Por ajo që konfirmohet zyrarisht është fakti se policia e Durrësit e akuzon 29-vjeçarin vetëm për vjedhje. Për këtë akuzë Gjykata e Durrësit dha sot masën e sigurisë “arrest me burg” me afat 30 ditë për Alfred Skonjën duke i lëne detyra policisë dhe prokurorisë për zbardhjen e ngjarjes.
Tashmë policia e Durrësit duhet të sqarojë publikisht se cilat ishin arsyet që e çuan atë të mashtronte duke thëne se parandaloi një vrasje. Po ashtu duhet të sqarojë cili ishte objektivi, kush është porositësi dhe motivi i vrasjes së presupozuar.
Ministria e Brendshme dhe Policia e Shtetit minimalisht i detyrohen një sqarim publikut për mashtrimin e policisë së Durrësit.
Boldnews.al disponon prova që vërtetojnë mashtrimin publik të policisë.
Ja njoftimi i policisë para dy ditësh:
Specialistët për Krimet në Komisariatin e Policisë Durrës, në vijim të punës për zbardhjen e ngjarjeve pa autor dhe mbajtjen nën kontroll të kontigjentëve kriminalë me qëllim rritjen e sigurisë së qytetarëve, pas një pune hetimore intensive dhe të pandërprerë kanë bërë të mundur parandalimin e kryerjes së një vrasje, duke ndaluar autorin e dyshuar, konkretisht shtetasin Alfred Skonja 29 vjeç, banues në Durrës.
Ndalimi I tij u bë pasi nga kryerja e veprimeve hetimore ka rezultuar se Skonja, në bashkëpunim me një shtetas tjetër, për të cilin po punohet për kapjen e tij kishin ndërmarrë të gjitha masat e duhura dhe kishin kryer të gjitha veprimet përgatitore për vrasjen e një shtetasi. Ndalimi i tij u bë si rezultat i një pune operative të mirëorganizuar, ku Skonja ka qenë nën vëzhgim të vazhdueshëm gjatë kësaj periudhe nga Policia, me qëllim për të dokumentuar veprimet e tij të jashtligjshme.
Shtetasi i ndaluar kishte planifikuar që pas kryerjes së krimit do ta digjte me benzinë automjetin e vjedhur. Skonja, më datë 26.07.2016, në bashkëpunim me një shtetas tjetër, në Fushë-Krujë kanë vjedhur automjetin tip Volsvagen me targa AA 029 MM, në pronësi të shtetasit R.B. 22 vjeç, banues në fshatin Zheje, Kurbin, ndërsa targat i përkasin mjetit tip Peugeot në pronësi të shtetases R.B. 37 vjeçe, banuese në Durrës, të vjedhura më datë 18.07.2016
Automjeti i vjedhur është gjetur më datë 24.08.2016, rreth mesditës, pranë lumit Erzen. U gjetën dhe u sekuestruan në cilësinë e provave materiale: automjeti tip Volsvagen me targa AA 029 MM sende dhe mjete të ndryshme(veshje, kapele, kokore, lëndë djegëse benzin…) që do ndihmonin në kamuflimin e autorëve gjatë kryerjes së aktit kriminal dhe krimit.
Për arsye të hetimit nuk bëhen me dije detaje të mëtejshme. Skonja është person me precedentë penalë të mëparshëm. Materialet i kaluan për veprime të mëtejshme Prokurorisë së Rrethit Gjyqësor Durrës për veprën penale “Vjedhja” në bashkëpunim parashikuar në nenin 134, 25 të Kodit Penal. Boldnews.al
