3 goditje të forta mori kombëtarja shqiptarë këtë të hënë. Milot Rashica dhe Herolind Shala nuk e përtypën mirë mospërfshirjen në 23 lojtarët që shkuan në Francë. Ata deklaruan largimin nga kombëtarja dhe bashkimin me atë të Kosovës. Me ta u bashkua edhe Alban Meha nga Mitrovica që prej kohësh nuk thirret nga italiani De Biasi. Ky i fundit duket se nuk po qëndron pasiv pasi vendet e lëna bosh po i mbush me lojtarë të tjerë. Ai ka afruar menjëherë Jahmir Hykën që po kalon një formë të mirë të Licerna në Zvicër. Në një lidhje telefonike për “Supersport”, De Biasi vlerësoi se forma e mesfushorit ka ardhur në rritje në Zvicër.
“Shqipëria do të niset nga grupi që luajti në “Euro 2016″, por edhe nga lojtarë si Hykaj e Manaj. Hyka ka pasur një rendiment të shkëlqyer në Zvicër, ndërsa Manaj do të ketë mundësinë të luajë rregullisht dhe po rritet”, – tha De Biazi.
Reagimi i tij vjen pas lajmit se Milot Rashica vendosi të luajë për përfaqësuesen e Kosovës. Për këtë të fundit tekniku shprehu keqardhjen duke thënë se e kishte planifikuar si pjesë të kuqezinjve në ndeshjet eliminatore. Duke folur për vështirësitë për ndeshjet e Botërorit, De Biazi tha se: “Do të jetë një fushatë shumë e vështirë se kemi Spanjën dhe Italinë dhe vetëm një ekip kualifikohet”,-tha trajneri.
