Pas mesazheve që gjyqtari Shyqyri Çobo i dërgonte një gruaje palë në një proces civil ka reaguar dhe bashkëshortja e tij.
Ajo po hetohet nga prokuroria për kanosjen e gruas që denoncoi gjyqtarin Shyqyri Çobo.
Sipas policisë mësohet se bashkëshortja e gjyqtarit Çobo, Pranvera, banuese në Durrës ka kërcënuar ditën e djeshme shtetasen I.T banuese në Berat, të heqë dorë nga kallzimi i bërë ndaj bashkëshortit shtetasit Shyqyri Çobo.
Gjyqtari Shyqyri Çobo tashmë është marrë i pandehur nga Prokuroria për Krimet e Renda.
Ai u vu në qendër të vëmendjes pasi i kërkonte favore seksuale shtetases I.T. teksa kishte në dorë një çështje të saj në Berat.
Ja disa nga mesazhet erotike që gjyqtari Cobo i dërgon 32 -vjecares:
“Përshëndetje ! Gëzon të gjithë kredinë mirënjohëse nga ana ime. Performanca juaj më imponoi respekte pse jo dhe ndjesi. A u sqaruat me avokatin rekomandues. Problemi yt sinqerisht më diktoi keq-ardhje. Mos hezito me sms apo tel, do të mirëpres. Respekte, OK ?”.
Vajza 32-vjeçare e ka kuptuar qartë nëntekstin e këtij mesazhi, por nuk ka preferuar që të krijojë pakënaqësi tek gjyqtari, i cili drejtonte procesin gjyqësor civil ndaj saj. Ajo e ka falenderuar dhe më pas ka biseduar për çështjen gjyqësore, me avokatin e siguruar nga gjyqtari.
Nga ky moment, gjyqtari Çobo duket se ka tentuar në të gjitha format për ta bindur nënën e re të sapodivorcuar që të krijojë lidhje intime.
Në një mesazh të radhës, të siguruar nga “Boldnews.al”, i cili gjendet në kërkesën për pezullimin nga detyra, gjykatësi i bën një “skanim” femrës së re. “Përsa i përket çështjes të cilën natyrshëm Ti e ke “gangrenë” sinqerisht do kesh suport gjithë “kredinë” time juridike ..! Ok ?? Së dyti në kondicionin social në perceptimin tim aktualisht je “skanuar” femër (mami) tepër bashkëkohore potente plot vizion.. Ky është dhe “motivi” imponues i imi që ti të jesh mikesha ime konseguente. Nuk dua të gjykoj se ti je një zonjë provinciale me mëndësi fshatareske.. Fundja në CV-in tënde je dikushi..Shpresoj mirëkuptimin tuaj..! Ok ??”.
Më tej, gjyqtari nis të përdorë “artilierinë” e rëndë joshëse, duke thirrur në ndihmë të tij shprehje filozofike: “Psikoanalisti austriak Sesil Frojd shkruan se ‘kur je i martuar dhe ke nje te dashur ky eshte komoditet, nese i dashuri eshte dikushi atehere ky eshte luks ”. Pavarësisht tentativave të shumta, shtetasja I.T. nuk ka rënë pre e provokimeve të gjykatësit, duke e kallëzuar këtë të fundit në Policinë e Beratit.
