Në këto momente në Himarë po mbahet protesta e paralajmëruar nga komunitetit himarjot për çështjen e pronave. Organizatori i kësaj proteste, biznesmeni Nikollaq Neranxi në fjalën e mbajtur i ka kërkuar Kryeministrit Edi Rama që të anulojë planin e zhvillimit që përfshin shembjen e shumë shtëpive në Himarë.
Neranxi i kujtoi kreut të Bashkisë së Himarës, Jorgo Goro dhe Kryeministrit, Edi Rama se do të mbajnë përgjegjësi për këtë që po bëjnë. Ai theksoi se para dhe pushteti po u errëson sytë dhe se nuk dinë se çfarë po bëjnë.
“Kam një mesazh personal për Kryeministrin Rama. Duke pasur mamanë nga Vunoi ne kemi njohje shumë të vjetër z. Rama. Z. Rama meqë ke menduar dhe të pleqërosh në këto anë dhe jot ë ikësh diku gjetkë, si ta mori mendja t’i prishësh shtëpinë djalit tim!
Nuk mendove sado pak për të ardhmen e djalit tënd Zaho? Si bij të familjeve që kanë njohje të vjetra. Çfarë do t’i tregojnë njëri-tjetrit këta kur të rriten… sesi babai i njërit grabiti shtëpinë e tjetrit?! Pse ndez vatra armiqësie që do të mbarten në breza z. Rama? Thirri mendjes dhe anulo urgjentisht çdo plan ogurzi për të ç’bërë Himarën”, deklaroi Neranxi.
Nikollaq Neranxi gjate protestes ne Himare by PanoramaVideo
Dule: Rama i kapur nga interesat mafioze
Në protestë ka mbajtur fjalë dhe kreu i Partisë Bashkimi për të Drejtat e Njeriut Vangjel Dule. Kreu i PBDNJ-së tha se, prona sot në Himarë është në rrezik nga interesa mafioze.
“Statusi i pronës në Bashkinë e Himarës është në rrezik i menjëhershëm tjetërsimi nga interesa të paligjshme mafioze që fatkeqësisht kanë arritur të interesojnë dhe ndikojnë në politikat qeveritare dhe zgjedhjet e vetë Kryeministrit të vendit z. Rama”, u shpreh Dule.
“Koncepti i Kryeministri të vendit dhe i mentorit të tij apo ish-mentorit të tij z. Kokëdhima është një dhe i vetëm: me çdo mjet dhe mënyrë grabitja e pronës, zhveshja e himarjoteve nga kjo e drejtë e shenjtë”, përfundoi kreu i PBDNJ-së.
Vangjel Dule ne proteste by PanoramaVideo
Bejleri: Qeveria “Rama” nuk e ka të gjatë
Ish-kandidati për Bashkinë e Himarës për PBDNJ, Fredi Beljeri gjatë fjalës së tij që e mbajti në greqisht dhe shqip, u shpreh se qeveria “Rama” nuk e ka të gjatë jetën e saj dhe nuk la dhe pa sulmuar ish-deputetin e PS-së, Koço Kokëdhima.
“Sot Koço Kokëdhima nuk është asgjë. Të gjithë në jetë dhe politikë janë kalimtarë, për pak muaj qeveria “Rama” nuk do të ekzistojë. E drejta e himariotëve nuk mund të vritet nga asnjë qeveri.
