Nga Boldnews.al
Pak javë më parë kryeministri Edi Rama lëshoi një ofendim ndaj kritikëve të projektit të stadiumit “Qemal Stafa”. Duke i cilësuar si “qorra”, Rama iu përgjigj zërave kundër duke thënë se fasada historike e stadiumit “Qemal Stafa” do të ruhej.
“Për qorrat që s’duan të hapin sytë, po hapin vetëm gojën për të baltosur çdo ide, projekt, pune dhe tani i janë turrur Shtëpisë së Re të Kombëtares, s’ka asnjë ilaç! Por për të gjithë ata që duan të shohin se si do të ruhet fasada e ‘Qemal Stafës’ (e vetmja gjë me vlere në atë gërmadhe), ja projekt-ideja e integrimit të saj në zemrën e Arenës Kombëtare, ku do të jetë edhe Muzeu i Kuqezinjve”, – shkroi Rama në Facebook më 27 prill të këtij viti.
Por sot është tepër e lehtë të kuptosh se kush ishte “qorri” në atë kohë dhe cili po tenton të manipulojë opinonin publik.
Sot Edi Rama në një tjetër reagim kërkon të “qorroj” sërish kritikët e tij duke u thënë se fasada e stadiumit “Qemal Stafa” po ruhet brenda Institutit të Monumenteve të Kulturës.
“Fakti është që fasada monument kulture po trajtohet me të gjitha standartet profesionale nën mbikqyrjen e Institutit të Monumenteve të Kulturës në bashkëpunim me qendrën italiane të ekselencës në restaurim Palazzo Spinelli”– shprehet ai në facebook.
Duke i cilësuar injorant ata që denoncuan shembjen e fasadës së stadiumit, Rama po justifikon veten duke thënë se basorelievet janë turpi i këtij vendi.
“Kujevënësit profesionistë që argument kanë injorancën kanë vënë alarmin (për dy basorelieve pa asnjë vlerë, që tutkunët e regjimit të vjetër i’a mballosën fasadës së “Qemal Stafës”) dhe po bërtasin që po dëmtohet trashëgimia kulturore. Ato basorelieve që turpëronin edhe Realizmin Socialist, e kanë kryer misionin e tyre të shëmtimit e nuk hyjnë askund si vlerë e trashëgimisë kulturore.”– shton më tej kryeministri Rama.
Në fund kryeministri i vendit lëshon sërish batutën e përdorur në regjimin e dikurshëm.
“Prandaj, edhe njëherë #QentëLeTëLehinKarvaniDoEcëPërpara dhe stadiumi i ri do të jetë përgjigja përfundimtare, për gjithë furtunat në gotën e dembelizmit mendor e të karshillëkut provincial ndaj të resë, që u ngritën e do të ngrihen, derisa Arena Kombëtare të imponohet me të gjithë rrezatimin e saj”– përfundon reagimin në facebook.
Pjesë e këtij krimi të trashëgimisë kulturore është edhe Ministrja e Kulturës Mirela Kumbaro. Me zë dhe me figurë, ajo ka garantuar më përpara se fasada e vjetër e stadiumit do të ruhet.
“Fasada e stadiumit do të ruhet dhe jo vetëm kaq, por madje do të jetë pamja ballore e stadiumit të ri. Këtë projekt ekzistues e konservojmë dhe e sjellim me projektin e ri kështu si është”, deklaroi ministrja e Kumbaro, gjatë vizitës dhe inspektimit në terren, të punimeve mbi prishjen e stadiumit kombëtar “Qemal Stafa”.
Edhe pse mungon një ndjesë publike nga qeveria, sot stadiumi është rafshuar dhe çdo “qorr” tashmë shikon më mirë të vërtetën përballë propogandës së ofruar nga kryeministri Edi Rama.
