Prokuroria e Krimeve të Rënda prej dy muajsh ka nisur hetimet për një sërë zyrtarësh të Policisë së Shtetit, të cilët dyshohet se janë të përfshirë apo tolerojnë kultivimin dhe trafikun e lëndëve narkotike në vend.
Hetimi prej dy muajsh është mbajtur sekret nga Prokuroria e Krimeve të Rënda, i vetmi institucion që ka tagër të hetojë zyrtarë të Policisë. Hetimi ka nisur në bazë të një raporti mbi drogën, i përpiluar nga SHISH-i, i cili është dorëzuar Prokurorisë.
Ndërkohë, pas dy muajsh hetime, Prokuroria ka njoftuar SHKB-në e Ministrisë së Brendshme në lidhje me hetimet.
Kjo shpjegon edhe arsyen se përse PD-ja po del në deklarata duke sulmuar disa zyrtarë të Policisë së Shtetit si pjesë e trafikut të drogës.
Ndërkohë, burime nga Prokuroria saktësojnë se lista me zyrtarë që denoncon PD-ja, nuk është ajo e atyre që janë nën hetim. Megjithatë nuk përjashtohen mundësitë se objekt hetimi mund të bëhen edhe ata emra që denoncon PD-ja.
