Një nga ministritë që ka në fokus zhvillimin e territorit të vendit, po zhvillon në fakt zyrat e saj! Bëhet fjalë për ministrinë e Zhvillimit Urban.
Boldnews.al ka siguruar dokumentet e një tenderi mjaft të majmë që ka në dorë ministria Eglantina Gjermeni. Sipas këtyre dokumenteve, është hapur procedura për rikonstruksionin e godinës së ministrisë me një fond prej 2.2 miliardë lekësh të vjetra. Nga këto lekë, 830 milionë është vlera e financimit për vitin 2016 dhe 1.3 miliardë është vlera e financimit për vitin 2017. Pra, ministria ka filluar që tani të shpenzojë paratë e vitit të ardhshëm, kur në fakt, me këto lekë, mund të ndërtonte disa vepra në shërbim të komunitetit.
Sipas dokumenteve, ndërtesa e Ministrisë së Zhvillimit Urban të Republikës së Shqipërisë ndodhet në qendër të kryeqytetit, pjesë e ansamblit të ndërtesave, Ministrive, të qendrës historike të qytetit të Tiranës. Monument i kategorisë së dytë, ndërtuar në seksione të ndryshme, ku seksioni i parë ka shërbyer si ndërtesa e “Assicurazioni Generali”, ndërtuar në vitin 1932. Kjo ndërtesë fillimisht ka qenë me 3 nivele mbi tokë, ndërsa në 20 vitet e fundit është ndërtuar dhe kati i sipërm (pa leje).
Godina ka pësuar dëmtime dhe amortizim të skajshëm, qoftë nga jetëgjatësia e saj, ashtu dhe nga ndërhyrjet në punimet e brendshme sipas funksioneve të përdorimit nga institucione, që ka pasur në vite.
Fasada e godinës, thuhet në këto dokumente, është tejet e amortizuar, profilet e dritareve dhe vetratat janë në kundërshtim, referuar rëndësisë së ansamblit të monumentit të kulturës.
Relacion teknik MZHU perfundimtar
Përveç amortizimit që kjo godinë ka në fasadën e saj, paraqet probleme dhe në ndarjet në interierin e saj, ku ndahet respektivisht në pesë institucione të ndryshme, sipas agjencive të cilat funksionojnë në të, por ndërhyrjet dhe punimet për ndarjet e ambienteve të zyrave kane tjetërsuar skemën e qarkullimit linear të godinës.
(Boldnews.al)
