“Eskobari i Ballkanit”, Klemend Balili është në territorin shqiptar dhe Policia e Shtetit është në dijeni të këtij fakti.
Në fund të muajit korrik, Policia e Shtetit siguroi në rrugë operative informacionin se i kërkuari ndërkombëtarisht, Balili, gjendet në Jug të vendit. Burime konfidenciale i raportojnë “Boldnews.al” se, menjëherë pas marrjes së këtij informacioni, janë organizuar disa operacione për gjetjen e Klemend Balilit, i cili akuzohet nga autoritetet greke si koka i një rrjeti të fuqishëm ndërkombëtar narkotikësh.
Gjithsesi, burimet e “Boldnews.al” në Policinë e Shtetit nuk arritën të japin një përgjigje bindëse se përse nuk është bërë i mundur arrestimi i tij, kur informacioni operativ dhe i besueshëm e vendos atë në territorin shqiptar. Nga ana tjetër, vijon të mos ketë ende një reagim të arsyetuar mbi akuzat publike të Partisë Demokratike, e cila pretendon se Balili është duke shijuar pushimet në të njëjtin hotel me një zyrtar të lartë, në qytetin e Sarandës.
Arrestimi i munguar i Klemend Balilit u shndërrua në një debat të ashpër publik dhe politik rreth dy muaj më parë. Në një operacion të gjerë ndërkombëtar antidrogë, në Greqi dhe në disa vende të tjera u arrestuan 11 anëtarë të një grupi kriminal që trafikonte lëndë të forta narkotike. Në bazë të të dhënave hetimore të autoriteteve ndërkombëtare, në krye të rrjetit qëndronte Klemend Balili, biznesmen në Sarandë dhe njëkohësisht Drejtor i Shërbimit të Transportit në këtë qytet. Për disa ditë me radhë, Policia e Shtetit nuk jepte asnjë konfirmim mbi përfshirjen e Balilit në këtë rrjet, ndërkohë që deklaronte se ishte pjesë e operacionit ndërkombëtar.
Media greke arriti të zbulonte të dhëna të shumta hetimore, si edhe bëri publik emrin e Balilit, duke e quajtur edhe “Eskobarin e Ballkanit”. Vetëm në atë moment, Policia Shqiptare u detyrua të pranonte se kishte dijeni për rolin e tij. Por ndërkohë, Balili nuk gjendej më në shtëpinë e tij dhe kishte dyshime të forta se ai ishte larguar edhe nga territori shqiptar.
Në javën e dytë të gushtit, Partia Demokratike publikoi foto të Balilit në plazhin e Sarandës, duke akuzuar në këtë mënyrë policinë se e kishte para syve dhe nuk e arrestonte. Në mënyrë informale, drejtuesit e Ministrisë së Brendshme u munduan të injorojnë këtë informacion ose ta përgënjeshtrojnë me anën e medias në shërbimin e tyre.
Por historia ka disa elementë vërtetësie. “Eskobari i Ballkanit”, Klemend Balili gjendet në Shqipëri dhe Policia duket se po punon për ta arrestuar. Por, nëse është i saktë informacioni i dhënë nga PD se Balili gjendet në të njëjtin hotel ku qëndrojnë edhe zyrtarë drejtues të Policisë së Shtetit, atëherë arrestimi i tij duket se do të shtyhet shumë në kohë.
(Boldnews.al)
