Deputetja demokrate Albana Vokshi i ka kërkuar sërish llogari ministrit të Shëndetësisë, Ilir Beqaj për mungesën e ilaçit për fëmijët me leucemi.
Vokshi thotë se Ministri Beqaj përhap propagandë me materiale të montuara por se nuk përgjigjet për mungesën e ilaçit të fëmijëve me leucemi.
“Ministri i Shëndetësisë Beqaj nuk reagoi për mungesën prej më shumë se 3 muajsh te Asparaginaza-s, medikamentit për kimioterapinë e dhjetëra fëmijëve të prekur nga tumore…të cilëve çdo ditë ju rrezikohet jeta. Ministri Beqaj nuk ka dëgjuar zërin e nënave dhe nuk ka parë lotët e tyre kur luten dëshpërimisht për mbështetje nga shteti për shpëtimin e jetëve të fëmijëve të tyre…Ministri Beqaj nuk ka reaguar as ndaj thirrjeve të shoqërisë civile: shoqatës “together for life” dhe deklaratës së Komitetit Shqiptar të Helsinkit. Ministri Beqaj nuk ka reaguar as për humbjen e 6 jetëve të pacientëve të prekur me HIV/AIDS prej mungesës së barnave për shkak të neglizhencës se Ministrit. Ministri nuk reagon as për mungesat e shumta në çdo spital e qendër shëndetësore…duke rrezikuar kështu shëndetin dhe jetën e pacientëve. Por ka një javë që shpërndan materiale të montuara për vizitat e tij në bregdet”, shprehet Vokshi.
Sipas saj Shqipëria është njësoj si para 1 shekulli, ku pacientët vdesin për mungesën e një gjilpëre.
“Kush paguan për ‘paketën e gënjeshtrave’ të Ministrit të Shëndetësisë që shpërndahen studiove televizive me aplikacionin WeTransfer? Ky aplikacion është ‘falas’, por koordinatori i korrupsionit qeveritar me ‘eskortë propagande’, i nxirë nga rrezet e diellit, duke mos lejuar këmbë gazetari për t’iu afruar në bregun e pistë ku e ka zhytur shëndetësinë… aty ku pacientët vdesin për mungesën e një gjilpëre si në Shqipërinë e viteve ’20… aty ku fëmijët nuk marrin asnjë shërbim urgjence se ambulancat nuk kanë naftë, e sigurisht nuk mund të marrin asnjë shërbim shëndetësor për mungesë barnash, mjetesh e pajisjesh…Libri “Dy bredharake në Shqipëri” shkruar ekzaktësisht 1 shekull më parë nga një çift bashkëkombës të Tony Blair përshkruan Shqipërinë mes varfërisë dhe ahengut!”, deklaron Vokshi.
