Policia e Fierit ka zbardhur dhe dokumentuar një vrasje të ndodhur në Greqi 6 ditë më parë. Bëhet fjalë për një krim të rëndë ku një 26-vjeçar ka vrarë kushëririn e tij pas një sherri për gratë në gjendje të dehur. Trupi i viktimës u gjet disa ditë më pas i groposur nga kushëriri.
Policia tha se dy djemtë punonin çobanë në Greqi dhe mbrëmjen e 3 gushtit, Denisi i kishte kërkuar Vladimirit të shkonin të vidhnin një frezë për të punuar tokën.
Pasi kanë pirë, natën, janë nisur për të kryer vjedhjen, po rrugës janë grindur pasi Vladimiri i kishte sharë gruan kushëririt të tij, duke e quajtur k****. Në grindje e sipër, Denis Zaka e ka vrarë kushëririn e tij dhe e ka varrosur në përrua, pikërisht aty ku policia greke e gjeti pasi ai tha më në fund të vërtetën dhe pranoi autorësinë.
Zyrtarisht policia thotë se më datën 07.08.2016, është paraqitur në Sektorin e Hetimit të Krimeve të rënda shtetasi Mersin Murrizi i cili ka kallëzuar se djali i tij Vladimir Murrizi është vrarë në Greqi, duke sjellë edhe si deshmitarë shtetasin Denis Zaka, kushëririn e parë të tij me të cilin ka qënë bashkë në Greqi.
Lidhur me këtë kallëzim u kryen veprimet procedurale si: pyetja e katër personave që kanë dijeni për veprën penale, u bënë kqyrja e telefonave, tabulateve, SMS-ve dhe rrjeteve sociale me të cilët kishte komunikime.
Nga kryerja e veprimeve proceduriale lindën dyshime të bazuara se ishim para një krimi vrasje dhe se i dyshuar ishte shtetasi Denis Zaka, kushëriri i parë i tij.
U intervistua shtetasi Denis Zaka, i cili kishte shumë kontradikta në thënie që nuk përputheshin me tabulatet telefonike.
I vendosur para provave kontradiktore për ato që kishte deklaruar, pranoi se ai e kishte kryer vrasjen e kushëririt të tij, shtetasit Vladimir Murrizi, duke dhënë shpjegime të hollësishme për motivin, mjetin me të cilin kishte realizuar vrasjen dhe vendin ku e kishte fshehur kufomën në Greqi.
U bashkëpunua me Drejtorinë për Krimet e Rënda dhe Interpol Tirana dhe të gjitha të dhënat ju percollën menjëherë autoriteteve policore Greke, të cilat nga ana e tyre shkuan në vendin e ngjarjes dhe gjetën kufomën e groposur.
Për këtë arsye, me datën 08.08.2016, u bë ndalimi i shtetasit Denis Zaka, 26 vjeç, lindur në Lushnje dhe banues në lagjen numer 15, Durrës.
Për këtë ngjarje ju referuan materialet Prokurorisë për Krimet e Rënda Tiranë, për veprën penale “Vrasje për shkak të marrëdhënieve familjare” parashikuar nga Neni 79/c i Kodit Penal.
