Të paktën 20 persona kanë humbur jetën dhe të tjerë rezultojnë të zhdukur. Ky është bilanci i shkaktuar nga moti i keq që përfshiu Shkupin dhe rrethinat. Lajmi është konfirmuar nga MPB-ja në Shkup, shkruan Alsat-m.
“Deri sot në orën 8:30, ne kemi zbuluar 15 viktima. Ekipet tona ende po bëjnë kërkime për viktima të mundshme të tjera”, ka thënë zëdhënësja e policisë, Liza Bendevska. 10 prej viktimave janë shqiptarë.
Viktimat janë nga Haraçina, Hasanbegu dhe Stajkovci, si vende më të goditura nga moti i keq.
Banorët e lagjes së Hasanbegut, kanë rrëfyer për tmerrin që kanë përjetuar gjatë vërshimeve duke thënë se kjo nuk ju kishte ndodhur asnjë herë më parë. Ata thonë se me vite të tëra kanë kërkuar rregullimin e kanalizimit për të shmangur situata të tillë, por se fatkeqësisht nga autoritetet kompetente nuk është ndërmarr asgjë në këtë drejtim.
Gjatë natës së kaluar, por edhe sot, ekipet e Shtabit për Siguri dhe Shpëtim të qytetit të Shkupit po ndërhyjnë për të pastruar rrugët e bllokuara nga reshjet e shiut.
“Për momentin të gjitha ekipet e Shtabit janë në terren dhe po punojnë për ta lehtësuar komunikacionin”, theksohet në komunikatën për media nga qyteti i Shkupit. Jozyrtarisht thuhet se janë 30 persona të vdekur.
Ekipet e shpëtimit arritën të shpëtojnë dhe një grua nën rrënoja, që për fat të mirë, sipas mjekëve është me plagë të lehta, njofton TetovaSot.
Mbrëmë në spitalin e vjetër të qytetit janë pranuar 21 persona dhe 7 janë mbajtur për kurim të mëtejshëm mjekësor. Të tjerët me dëmtime të lehta u dërguan në shtëpi.
Presidenti Gjorge Ivanov, ka dhënë urdhër për aktivizimin e ushtrisë dhe kë bërë thirrje për të vënë të gjitha kapacitetet e mundshme në dispozicion për të ndihmuar në zbutjen e dëmeve të shkaktuara nga stuhia.
Personat përgjegjës nga Ushtria në koordinim me shtabet të krizës tashmë janë në teren dhe në vendet që konsiderohen në momente më kritike dhe janë të përfshirë në mënyrë aktive në ndihmë të qytetarëve në nevojë.
Mediat në Maqedoni kanë raportuar se nga moti i keq ka humbur jetën një grua por ky informacion nuk është konfirmuar nga autoritetet kompetente.
