Nga Boldnews.al
Të dhënat e siguruara nga Boldnews.al tregojnë se disa media në Shqipëri kanë financime të dyshimta nga kompani dhe individë të cilët rezultojnë të jenë nën hetim nga organi i akuzës Bëhet fjalë për dy mediat; Shqiptarja.com dhe Report TV, të zotëruara nga italiani i natyralizuar Carlo Bollino dhe bashkëshortja e tij Alba Malltezi.
Të dy këto media mbështeten financiarisht prej vitesh nga kompania “FFM Group”, e krijuar fillimisht për trajnimin e gazetarëve, operatorëve dhe fotografëve në fushën e medias. (Shkarko ekstraktin e QKR)
“FFM Group” rezulton një shoqëri e krijuar në 2011 dhe ku për ortakë ka bashkëshorten e Bollinos, Alba Malltezin, Eva Doçin si dhe një kompani italiane të quajtur “Superba S.R.L” me seli në Napoli. Kjo e fundit, prej disa muajsh është nën hetim nga Prokuria shqiptare për pastrim parash në zonat offshore. “Superba S.R.L” është aksionere edhe në kompaninë “Everest Oil” e cila ka për administrator ish kandidatin për Kryetar të Bashkisë së Tiranës dhe ish drejtorin e KESH Gjergj Bojaxhiun. (Shkarko ekstraktin në QKR të Everst OIL)
Në lajmet e publikuara nga Shqiptarja.com apo Report TV, kompania “Superba S.R.L” nuk është përmendur kurrë për hetimet e prokurorisë apo për lidhjet me kompaninë “Everst Oil” të Gjergj Bojaxhi. Një tjetër detaj i rëndësishëm ka të bëjë edhe me mbështjen e fuqishme të Gjergj Bojaxhi zgjedhjet e 2015 për Bashkinë e Tiranës, nga mediat e Carlo Bollinos.
Në 2014 Drejtoria e Tatimeve i ka falur një gjobë prej 275.000 lekësh “FFM Group” për mosdeklarimin e punonjësve duke krijuar kështu evazion fiskal. (Kërko në dokument për FFM Group) Kjo vërteton edhe zërat që qarkullojnë se në mediat e Carlo Bollinos punonjësit janë në të zezë ose pagat e tyre nuk deklarohen të plota.
“Media content” është një tjetër kompani e krijuar nga Carlo Bollino me fokus krijimin e rrjeteve televizive analoge dhe digitale. Nuk dihet qëllimi i kësaj kompanie por sipas të dhënave zyrtare ka për ortakë bashkëshorten e tij Alba Malltezi dhe shoqërinë “FFM Group”.
Bollino bleu televizionin Taçit i cili është nën hetim bashkë me Superba S.R.L
Në vjeshtë të vitit 2015, televizioni “A1 Report” ndahet pas një konflikti mes aksionerëve Koço Kokëdhim dhe Carlo Bollino. Ky i fundit vendosi që të mos mbyll biznesin e medias dhe për këtë blen liçencën e “Albania Screen”, një televizion i falimentuar në pronësi të Rezart Taçit.
Në tetor 2015, Bollino e regjistron në emër të financieres së tij Lindita Dode, televizionin e ri tashmë të quajtur “Report TV”. Edhe pse ky televizion vijon transmetimet ditore mbetet ende enigmatike marrëveshja që ka nënshkruar Bollino me biznesmenin e arrestuar Rezart Taçin.
Dyshimet shtohen edhe më tej, pasi prokuroria ka nisur hetimet për “Mashtrim” dhe “Evazion Fiskal” ndaj ish pronarit të “Albania Screen” Rezart Taçi si dhe njëherësh ndaj kompanisë italiane “Superba S.R.L”.
Bashkë me to, nën hetim është edhe “Everest Oil” e cila administrohet nga Gjergj Bojaxhi dhe ka për ortak kompaninë “Superba S.R.L”. Të tre këto kompani janë përfshirë në një skemë të fshehjes së ardhurave duke transferuar miliona euro në zona offshore për tu shmangur nga taksat shqiptare.
Sipas dosjes së dorëzuar në Prokurori, një nga pronarët e shoqërisë italiane “Superba S.R.L”, Guido Ottolenghi, rezulton të jetë njëherësh edhe pronar i kompanisë që operon në Vlorë “La Petrolifera”.
Sipas hetimeve të prokurorisë, shoqëritë “La Petrolifera”, “Superba S.R.L” dhe “ARMO” dyshohet të kenë qarkulluar në llogaritë e kompanisë “Everest Oil” të administruar nga Bojaxhiu shuma të mëdha parash në formën e kreditimit që shkon në shifrën e rreth 172 milion dollarë amerikanë.
Vetëm në vitet 2013 dhe 2014, “Everest Oil” rezulton me fitim mbi 200 milionë Lekë dhe xhiro mbi 18 miliardë Lekë, ndërkohë që ka patur respektivisht 11 dhe 6 punonjës.
Vetëm për muajin korrik-nëntor 2012, kompania “Superba S.R.L” e cila është gjithashtu aksionere e kompanive të Carlo Bollinos, ka qarkulluar mbi 30 milion dollarë nëpërmjet kompanisë “Everest Oil” e Gjergj Bojaxhi.
Dyshimet mbi aktivitetet dhe bizneset e Carlo Bollino bien edhe mbi disa kompani të krijuara vonë nga italiani i shqipëtarizuar, ku nuk dihet qëllimi nëse janë për të përfituar fonde publike ose për të kryer evazion fiskal.
