Ministria ruse e Mbrojtjes përmes një deklarate ka konfirmuar se një helikopter i tipit “Mi-8” është rrëzuar nga një predhë e lëshuar nga territori sirian, pasi kishte dërguar ndihma humanitare në Aleppo.
Të paktën 3 personat e ekuipazhit, si dhe dy oficerë ushtarakë nga Qendra ruse e Pajtimit ishin duke u rikthyer në bazë. Të pestë ata janë shpallur të vdekur sipas asaj që bëhet e ditur nga Kremlini.
Zëdhënësi i Kremlinit, Dmitry Peskov konfirmoi përmes një deklaratë të pak minutave pas ngjarjes se, të gjithë personat në bordin e helikopterit kanë vdekur.
“Pjesëtarët në bord janë vrarë, sipas asaj që kemi mësuar nga një raportim i Ministrisë së Mbrojtjes. Ata ranë heroikisht, teksa po përpiqeshin të devijonin helikopterin në mënyrë që të shkaktonin sa më pak viktima në terren”, tha Peskov. “Kremlini ofron ngushëllimet më të sinqerta familjarëve të atyre që ranë në krye të detyrës”, shtoi ai.
“Sot më 1 gusht, një helikopter transporti Mi-8 është qëlluar dhe është rrëzuar mbi provincën e Idlibit, pasi kishte dërguar ndihma humanitare në qytetin e Aleppos. Tre pjesëtarët e ekuipazhit dhe dy oficerë ishin në bordin e tij me mision në Siri”, thuhet në deklaratën e Ministrisë së Mbrojtjes.
Helikopteri ishte duke u rikthyer në bazën ajrore ruse të Khmeimimit, shton deklarata. Ministria ruse nuk ka bërë ende të ditura identitetet e personave në bord.
Pamje të tmerrshme janë publikuar më pas nga militantët e Shtetit Islamik, të cilët tërheqin zvarrë dy trupa të pajetë të personave që ndodheshin në bordin e avionit.
Ky është helikopteri i tretë rus që humbet në veprim e sipër në Siri gjatë këtij viti.
