Nga Boldnews.al
Ministri i Energjisë Damian Gjiknuri dhe Administratori i OSHEE Ardian Çela u kujdesën që gjatë vizitës në Dhërmi të marrin edhe një grup gazetarësh që mbulojnë sektorin e ekonomisë.
Sëbashku ata kanë inspektuar nga afër investimet e kryera në zonën e Dhërmiut dhe Himarës, ndërsa më pas kanë zgjedhur të pushojnë duke konsumuar një drekë. Nuk është hera e parë që drejtues të lartë institucionesh afrojnë grupe gazetarësh duke u ofruar dreka apo ndonjë fundjavë në ndonjë zonë turistike.
Përpara gazetarëve të transportuar që nga Tirana, Gjiknuri dhe Çela u mburrën se me ndërhyrjet në nënstacione dhe në rrjet do të garantohet furnizim cilësor me energji për këto zona ku kanë munguar investimet që prej elektrifikimit.
“U vu në funksionim për herë të parë një stacion i lëvizshëm, i cili u instalua në Himarë, gjithashtu janë bërë edhe investime të reja, siç janë linja 35 kilovolt dhe nënstacioni i ri në Dhërmi. Po shqyrtojmë edhe ofertat për dy nënstacione të reja për Orikumin dhe Himarën, të cilët do të jenë investime përfundimtare, e do të kompletojnë të gjithë pjesën e jugut, nga Vlora deri në Sarandë”, tha ministri Damian Gjiknuri.
Prej vitesh zona e jugut ka vuajtur mungesën e energjisë elektrike si dhe furnizmin jo -cilësor një problem ky që konstatohej më tepër gjatë sezonit të verës. Disa denoncime në Boldnews.al flisnin për mungesë të energjisë elektrike në fshatin e Borshit si dhe në plazhin e Shëngjinit.
Pavarësisht se është vit elektoral, OSHEE thotë se në 2017-tën është planifikuar një investim prej 100 milionë dollarësh në total, në të gjithë sistemin e shpërndarjes.
