Drejtori i Teatrit Kombëtar të Operas dhe Baletit, Ilir Kerni është dorëhequr nga posti që mbante jo prej shumë kohësh. Një status i djeshëm i Kernit plot indinjatë ka qenë edhe paralajmërimi.Burime nga TKOB bëjnë me dije se dorëheqja vjen për shkak të mosmarrëveshje me Ministrinë e Kulturës.
Një ditë më parë Kerni shprehu indinjatën e tij për buxhetin më të ulët sipas tij të akorduar nga qeveria, në një status në facebook.
Drejtori i TKOBAP shpërtheu ndaj ministres së Kulturës Mirela Kumbaro duke e akuzuar për buxhetet e pakta, që merr për zhvillimin e jetës artistike dhe realizimin e projekteve ky teatër.
“Gjërat e bujshme kurrë s’i kam dashur, lutem pak vëmendje për të njohur faktet! Vetëm 28 muaj punë për të transformuar gjithçka, me punë, punë dhe vetëm punë”, shkruan drejtori Ilir Kerni në statusin e tij në Facebook.
Kerni vë në dukje që për institucionin që ai drejton këto muaj buxheti ka qenë aq i ulët, ku për realizimin e një shfaqjeje mund të arrihen rekorde Guinness.
“Me buxhetin më të ulët historik… shpenzimi mesatar për një shfaqje nuk kalon te 600 eurot, pra mund të hyjmë në rekordet Guinness”, shkruan ai.
Por përballë këtij buxheti kaq të ulët që akordohet për Teatrin e Operës dhe Baletit, në 28 muaj sipas drejtorit Kerni shtetit i janë kthyer mbi 200 milionë lekë nga shitja e biletave.
Sipas tij, edhe Kosova ka disa herë më shumë buxhet të akorduar për realizimin e programit artistik. “Kemi kthyer mbi 200 milionë lekë buxhetit të shtetit, nga biletat, për rrjedhim shpenzimi mesatar del edhe më i ulët. Vetëm Kosova, pa përmendur vendet e rajonit, ka 9 herë më shumë buxhet për programin artistik”, shkruan në statusin e tij Kerni.
E me sa duekt ky ka qene edhe paralajmerimi i tij. “Falenderim me perulesi per artistet e mrekullueshem, stafin e produksionit dhe administraten perfekte. Falenderim me perulesi per artistet famoz shqiptar ne bote, kontributi i te cileve ishte gratis ne ndihme te shtepise tone te perbashket. Dhe sa e sa gjera te tjera jane bere…28 muaj pune gjigande. Tkobap Albania e pakrahasueshme me asgje tjeter ne kete vend. Ps. Fundi i pjeses pare!”, shkruante dje Kerni.
