Ministria e Drejtësisë jep detaje për ngjarjet që përfshinë sot burgun e Shënkollit në Lezhë dhe burgun e Vaqarrit në Tiranë.
Ministria deklaron se zjarri në institucionin e vuajtjes së dënimit në Shënkoll ka qenë aksidental për shkak të shpërthimit të një bombole gazi për gatimin.
“Ministria e Drejtësisë informon se sot rreth orës 16.00 në IEPV Lezhë është vënë re prezencë zjarri në njërën nga qelitë e këtij institucioni. Forcat zjarrfikëse dhe policia e burgjeve kanë ndërhyrë menjëherë për shuarjen e zjarrit. Në vendngjarje është gjetur i asfiksuar dhe pa shenja jete i paraburgosuri F. Sula. Dyshimet paraprake lidhen me një zjarrvënie aksidentale si pasojë e shpërthimin të një bombule gazi për gatim. Hetimet vijojnë për të përcaktuar detajet e mëtejshme të ngjarjes”, deklaron Ministria e Drejtësisë.
Më tej theksohet se Ministri Manjani dhe autoritetet e sistemit penitenciar po e ndjekin me vëmendje ngjarjen. “Gjendja momentalisht po shkon drejt normalitetit ndërsa janë marrë të gjitha masat në bashkëpunim me policinë e shtetit për mbajtjen nën kontroll të plotë të situatës”, deklaron MD.
Përsa i përket plagosjes së një të dënuari në burgun e Vaqarrit, Ministria e Drejtësisë sqaron se i burgosuri është qëlluar nga jashtë dhe se hetimet vijojnë.
“Ndërkohë, sot rreth orës 16:00 në IEPV Vaqarr është plagosur me armë zjarri, nga jashtë institucionit një i paraburgosur, i cili është jashtë rrezikut për jetën. Drejtoria e burgjeve informon se po kryhen të gjitha veprimet hetimore dhe situata paraqitet e qetë”, përfundon deklarata e MD.
