Ish-deputetit Mark Frroku i është rrëzuar një kërkesë për përjashtimin e trupit gjykues, të cilët po e gjykojnë për vrasjen në Belgjikë. Më 8 korrik të këtij viti, avokatët e Frrokut depozituan një kërkesë në Gjykatën e Tiranës për përjashtimin e trupit gjykues.
Gjyqtari Sokol Pasho vendosi këtë të martë që të rrëzojë këtë kërkesë.
“Gjykata vendosi rrëzimin e kërkesës penale me nr. 984 regj. themeltar, që i përket kërkuesit Mark Frroku. Shpenzimet gjyqësore i ngarkohen kërkuesit. Kundër këtij vendimi lejohet ankim sipas ligjit, në Gjykatën e Apelit Tiranë”, thuhet në vendimin e shkurtuar të Gjykatës së Tiranës.
Ndërkohë, në gjyqin penal, ish-deputeti Mark Frroku deklaroi se “nuk jam alien si më përshkruan prokurori” dhe së bashku me familjen ka punuar me ndershmëri.
“Jam i pafajshëm, nuk kam lidhje me vrasjen”, tha ai, duke e pasur fjalën për atë që akuzohet: Vrasjen me paramendim në Belgjikë në 1999 të një shqiptari, pastrimin e parave, mosdeklarimin e pasurisë.
Avokati i tij ka paraqitur prova të reja për çështjen, por në seancë ishte i pranishëm edhe vetë Frroku që theksoi se akuzat ndaj tij janë “tendencioze, brutale dhe politike”.
Po ashtu, ish-deputeti ka hequr dorë nga gjykimi i shkurtuar, pasi avokati i tij, Tonin Prendi, kërkoi të hidheshin poshtë një sërë aktesh të dosjes së paraqitur për gjykim nga prokuroria, si p.sh. një akt-ekspertimi kontabël të pasurisë së ish-deputetit. Sipas tij, ekspertja që ka bërë akt-ekspertimi ka qenë i njëanshëm, pasi ishte inspektore në ILDKPI dhe se gjatë përpilimit të akt-ekspertimit nuk kishte marrë parasysh disa biznese të regjistruara të familjes Frroku.
Mark Frroku akuzohet për vrasjen e shtetasit shqiptar, Aleksandër Kurti, në vitin 1999 në Belgjikë, fshehjen e pasurisë dhe ndërtim pa leje.
