Dy persona u ekzekutuan dhe një tjetër mbeti i plagosur rëndë në qytetin e Vlorës, në një pikë bastes pranë lagjes “Partizani”.
Viktimat janë identifikuar si Ilir Deromema, rreth 45 vjeç, banues në Vlorë, pronari i eurollotos ku ndodhi vrasja dhe Dhimitër Çani 60 vjeç, ndërsa i plagosuri është identifikuar si Krenar Runaj 53 vjeç. Bolndews.al ka siguruar fotot e viktimave të cilët janë qëlluar me breshëri armësh teksa ishin të ulur në tavolinat jashtë lokalit.
Mësohet se kanë qënë 3 autorë të cilët kanë kryer krimin. Ata janë afruar me makinë pranë lokalit, njëri prej tyre ka zbritur nga makina dhe ka qëlluar në drejtim të viktimave.
Nga të shtënat mbeti i plagosur në gjendje të rëndë edhe 45-vjeçari Krenar Runaj.
Më pas makina e autorëve të krimit është larguar në drejtim të varrezave ose fshatrave të lumit të Vlorës. Ndërkohë një makinë e djegur, tip “Jeep”, me targa AA 210FS është gjetur plotësisht e djegur pranë varrezave. Dyshohet se mjeti i djegur është ai që kanë përdorur autorët e krimit. Pas verifikimeve rezultoi se mjeti është vjedhur në Fier, 2 muaj më parë.
Dyshohet se objektiv i vrasjes ka qenë Ilir Deromema. Një nga pistat e hetimit është hasmëria, për një vrasje e ndodhur në 1998. Ilir Deromema dyshohet se ka qenë autor i vrasjes së Lame Gockaj.
Mbiemri Deromemaj është i njohur njëkohësisht në Vlorë, pasi në zgjedhjet lokale të vitit 2015 Partia Demokratike vuri përballë mjekut Dritan Leli ndërtuesin Genc Deromemaj, i cili ka lidhje gjaku me viktimën.
