Një aksident tragjik u regjistrua gjatë ditës së sotme në aksin Gjirokastër-Tepelenë ku për pasojë humbën jetën 3 persona, mes tyre 2 fëmjë. Një mjet furgon “Mercedes” në të cilin udhëtonin 8 persona dhe një “Nissan off rod” me targa të Zvicrës ku udhëtonin tre persona u përplasën me njëri tjetrin.
Përplasja ka qenë shumë e fortë sa i ka marrë jetën oficeres së policisë Albana Hasani dhe foshnjës së saj menjëherë, në mjetin furgon, ndërsa në mjetin tjetër ku udhëtonte një familje nga Kosova humbi jetën fëmija vetëm 18 muajsh. Shtatë persona të tjerë janë plagosur shumë rëndë.
Dëshmitarët thonë se ishte shumë e vështirë edhe për të nxjerrë të plagosurit nga mjetet e shkatërruara shumë rëndë. Për këtë është dashur ndërhyrja e zjarrfikësve.
Aksidenti duket se ka ndodhur për shkak të një parakalimi të gabuar dhe me shpejtësi të madh. Policia ka dalë në këtë konkluzion për shkak të vendit ku ka ndodhur përplasja dhe forcës së madhe që ka shkatërruar tërësisht mjetet.
Furgoni drejtohej nga Hasan Dedja, bashkëshorti i viktimës njëherësh edhe ish-drejtor i Krimit Ekonomik në Policinë e Shtetit.
3 nga të plagosurit në gjendje të rëndë
Tre persona, të cilët janë transportuar me urgjencë me helikopter drejt kryeqytetit dhe që ndodhen aktualisht në reaminacionin e Spitalit të Traumës ndodhen në gjendje kome. Këtë fakt e bënë publik vetë bluzat e bardha. Sipas drejtorit të ‘Traumës’ Ë Bushi dhe mjekut, gjendja e tre të plagosurve paraqitet kritike për jetën pasi janë intubuar dhe kanë marrë fraktura.
“Tre vetë kanë ardhur në gjendje të rëndë. Dy janë fëmijë një i moshën 4-5 vjeç, një tjetër është 10 vjeç. Janë të intubuar, në gjendje kome. Një burrë i paidentifikuar është paraqitur në gjendje të rëndë.”, tha Gjovalin Bushi për gazetarët. Nga ana tjetër mjeku i ‘Traumës’ pohoi se një prej fëmijëve ka marrë goditje të mëdha në kokë. “Në gjendje të rëndë është një prej fëmijëve, pasi është goditur në kokë. Madje edhe burri, rreth 37-vjeç paraqitet rëndë.”, pohoi mjeku. “Rrugës janë edhe 5 të aksidentuar (aktualisht ne Fier), dhe janë me fraktura.”- tha Bushi.
Njoftimi i policisë
Njoftohemi se në aksin rrugor Gjirokastër-Tepelenë , në “Mashkullorë” janë përplasur dy automjete, një furgon me targa AA 760 LI me një mjet tip “Nissan” me targa ZH 750960.
Për pasojë kanë humbur jetën 3 persona. Shtetasia A.H dhe një fëmijë i cili kanë ndërruar jetë në spital, të dy këta shtetas ndodheshin në furgon, ndërsa fëmija tjetër që ka humbur jetën ndodhej në mjetin tip Nissan.
Në Spitalin rajonal janë transportuar dhe 7 të plagosur të cilët po marrin ndihmën mjekësore. Në vendngjarje ndodhet grupi hetimor i cili po punon për zbardhjen e shkaqeve të aksidentit.
