Kreu i Komisionit të posaçëm për reformën në drejtësi, Fatmir Xhafaj deklaron se komisioni do të mblidhej në rast se do të kishte një çështje për të diskutuar.
Në një deklaratë, ai thotë se Partia Demokratike nuk është korrekte në qëndrimet e veta, ndërsa pranon se është miratuar një draft gjatë mbledhjes së djeshme të komisionit ku nuk ishin të pranishëm përfaqësues të opozitës. Xhafaj tha se mbledhja e nesërme e seancës mund të zhvillohet normalisht për shkak se drafti përfundimtar është firmosur prej tij.
Xhafaj: Ju kërkoj ndjesë se jeni detyruar të qëndronit deri në këtë orë të vonë për shkak të çudirave që prodhon politika shqiptare, të marrësive të njëpasnjëshme dhe të gënjeshtrave të radhës që nxjerr në çdo moment për t’i bërë bisht përgjegjësive që ka ndaj qytetarëve shqiptarë dhe ndaj partnerëve të vendit. Kjo që bëri sot dhe teatrit që po zhvillon Partia Demokratike dhe më vjen keq për kolegët që janë pjesë e komisionit, është një gjë e turpshme, nuk është korrekte me qëndrimet e veta, dhe me qytetarët e këtij vendi dhe me partnerët. Ju më pyetët a ka mbledhje komisioni? Dihet! Unë nuk ka ndonjë mbledhje komisioni që nuk e thërret kryetari. A mund ta thërrisja, po kam që nga mëngjesi që unë pres të bëj një mbledhje komisioni. Për çfarë do ta bëj? Për të shqyrtuar një çështje të caktuar.
Mbledhja e seancës së Kuvendit-Xhafaj: Së pari, Kuvendi mund të mblidhet normalisht nesër. Ka një draft kushtetues, ka një projekt kushtetues, për të cilën është përgatitur e gjithë procedura e nevojshme parlamentare. Relatorët dhe unë kemi firmosur raportin që do t’i paraqitet seancës plenare për projektin kushtetues. A është ky i duhuri? Po themi ne! Po thonë SHBA! Po thotë BE. Ka dikush që nuk thotë dot po. Nga kjo pikëpamje projekti është gati.
Çështja e mbetur pezull, Xhafaj: Natyrisht kishte një çështje të mbetur pezull që ishte jetësimi i propozimit hibrid i zonjës Nuland i cili ishte propozim që konfirmonte qëndrimin e SHBA dhe BE. Atë propozim ne e kemi përfshirë në draftin që do të jetë nesër në mbledhjen e djeshme të komisionit të posaçëm parlamentar. Unë nuk mbaj përgjegjësi për opozitën që ka muaj të tërë që e bllokon dhe e bojkoton. Ishte pak qesharake pasi mbas kaq muajsh marrin pjesë në mbledhjen e komisionit.
A mund të miratonte komisioni një draft kur kishte ende negociata dhe sot është arritur marrëveshja?
Xhafaj: Ne kemi miratuar dje në gjendjen që ishte, pra të gjitha çështjet e tjera përfshirë propozimin hibdrit të zonjës Nuland që kishte mbështetjen e SHBA dhe BE. E lamë të hapur për shkak të negocimit të një pike. Kishte një çështje që kryetari i Partisë Demokratike ka vetëm një çështje. Ajo çështje ishte objekt i grupit negociator. Partia Demokratike dhe partnerët u angazhuan në një grup negociator për t’i dhënë zgjidhje asaj çështje. Ajo çështje ngeci dhe u desh ndërhyrja e Hahn për ta çliruar. Mbrëmjen e së hënës ka pasur një procesverbal që është mbajtur.
Është arritur deri në një moment të caktuar, mbledhja është ndërprerë dhe normalisht do të niste atje ku ishte ndërprerë. Kjo nuk mund të fillonte në komision, por atje ku duhej gjetur zgjidhja. Kryetarët e partive politike kishin rënë dakord me dy partnerët tanë që këtë ta zgjidhin nëpërmjet një grupi negociator. Do të duhej që po ky grup të mblidhej sot dhe t’i jepte zgjidhje kësaj çështjeje. Në dijeninë time, ekspertët e EURALIUS dhe OPDAT i kanë propozuar një draft që i jepte zgjidhje kësaj çështje. Në momentin që do të arrihej kjo dakordësi atje ku u ndërpre do të mblidhej komisioni parlamentar./Oranews
