Burime të sigurta nga Kryesia e Kuvendit të Shqipërisë bëjnë me dije për Boldnews.al se marrëveshja për reformën në drejtësi ka hasur sërish kundërshtime mes negociatorëve të forcave politike.
Negociatorët e PS Ëngjëll Agaç, ai i LSI Ylli Manjani dhe Oerd Bylyk Bashi nga PD si dhe ekspertët e EURALIUS dhe OPDAT janë përplasur mes njëri-tjetri mbi ndryshimet e fundit për rolin e Ndërkombëtarëve në reformën në drejtësi.
Sipas burimeve të Boldnews.al, komisionerët e PD dhe të LSI janë bërë bashkë duke kundërshtuar variantin e zbardhur nga ekspertët e huaj. Ata kanë refuzuar variantin e paraqitur nga ekspertët për dy institucionet, Këshilli i Lartë Gjyqësor dhe Këshilli i Lartë i Prokurorisë.
Pas diskutimeve të forta, mbledhja mes negociatorëve është ndërprerë për pak minuta ndërsa ende nuk janë mbledhur sërish anëtarët. Ndërsa anëtarët e Komisionit të Posaçëm për Reformën në Drejtësi po presin në këmbë draftin e dakordësuar të negociatorëve për ta votuar unanimisht dhe dërguar në parlament. Burime shtojnë se kryeparlamentari Ilir Meta ndodhet në zyrën e tij, në pritje për tu informuar mbi çdo pengese që po has miratimi i draftit final.
Mesa duket ky është edhe qëllimi që Ambasada Amerikane dhe zyra e Bashkimit Europian ende nuk kanë përshëndetur deklaratat e Bashës dhe Ramës të cilët thanë se arritën marrëveshjen.
Dështimi për arritje e një konsesusi mund të jetë larg, pasi anëtarët e komisionit kësaj here kanë marrë mesazh të qartë nga liderët politik se drafti duhet të dërgohet për miratim në parlament ditën e enjte.
