Ashtu siç lajmëroi pas takimit që zgjati 150 minuta me krerët e PD-së dhe LSI- së për Reformën në Drejtësi, Kryeministri Rama doli në një konferencë për mediat në Kryeministri ku foli për takimin e sotëm me Metën dhe Bashën dhe për fatin e reformës në drejtësi.
Kreu i qeverisë i bëri thirrje çdo deputeti që ditën e enjte të mos luajnë me fatin e Shqipërisë vetëm se kanë hallin e mandatit të tyre. Me besimin se në 21 korrik do të votohet Reforma në drejtësi, Rama u shpreh se ajo do të marrë 94 vota pro pasi kjo reformë nuk do të ripërsëritet më. “Nëse dështon ajo nuk është një reformë apo paketë ligjesh që mund të rifutet në punën e parlamentin por do të jetë dështim i madh i pamerituar për gjithë popullin shqiptar. Luhet fati i Shqipërisë”, u shpreh kreu i qeverisë.
“Nuk ndodh gjithnjë që një revolucion i vonuar për 25 vjet me radhë të jetë objekti i një diskutimi kaq të madh përballë një muri shurdh që synon me çdo kusht ta pengojë këtë revolucion paqësor dhe transformues për gjeneratën tjetër dhe për gjeneratat e tjera. Ky është një rast unikal për të thënë se ja çfarë mund të bëjë politika, e cila për fat të keq në Shqipëri është diskretituar kaq shumë sa dikush me të drejtë ia ka humbur kuptimin. Politika që është bërë si diçka e keqe që duhet t’i rrish larg se bëhesh pis. Në radhë të parë është një fuqi njerëzore për mirë, si mund të bëhet revolucioni në drejtësi pa politikën, është i pamundur. Kush mund ta çelë rrugën e këtij revolucioni përveç politikës”.
Kryeministri shtoi se 21 korriku do jetë ose dita e bashkimit dhe e votimit nga të gjithë, ose momenti dramatik i një ndarje të re.
“Politika forcë që mund të bëjë shumë mirë por edhe shumë keq është para të gjithave. N njëra anë populli që do të shikojë reformën dhe nga ana tjetër një grusht njerëzish që thuhet se përfaqësojnë popullin, po që po bien ndesh me këtë reformë, më e rëndësishmja dhe më historikja që kemi marrë përsipër të çojmë përpara. Pak ditë na ndajnë nga një moment që mund të jetë ai i bashkimit të të gjithëve dhe i votimit të të gjithëve bashkë, por mund të jetë edhe momenti dramatik i një ndarje të re, mes atyre që duhet të jenë të vetëdijshëm pse janë aty dhe atyre që po bëjnë çmos për të mos e lejuar këtë transformim kolosal të ndodhë. Jemi dhe do të jemi deri në fund të vendosur që ti hapim rrugën këtij revolucioni që Shqipëria të ndahet nga një epokë e karakterizuar nga mungesa e drejtësisë, kultura e pandëshkueshmërisë, ku njeriu i zakonshëm nuk gjen do t të drejtën në një derë gjykate. Vendosmëria jonë nuk lidhet me faktin që kjo është një reformë, që është detyrim ndaj njerëzve, vendit tonë, natyrisht edhe me partnerët ndërkombëtare se kemi ndërmarrë një rrugë atë të BE. Sot është më shumë se kaq”,- tha Rama.
