Megjithëse u raportua se ambasadorët Donald Lu dhe Romana Vlahutin do të ishin të pranishëm në mbledhjen me kryeministrin Edi Rama, kreun e PD-së, Lulzim Basha dhe kreun e Kuvendit, Ilir Meta, ata kanë konfirmuar sot se nuk do të jenë pjesë e diskutimeve.
Kjo vjen për shkak të deklaratave të kreut të PD-së, që nuk flet për propozimin e hibrid të Nuland por vetëm për mbështjetje në opinionin e Venecias.
Ambasadorët deklarojnë se vetëm nëse Basha rideklaron angazhimin e tij për negociuar mbi bazën e propozimit hibrid do t’i bashkohen diskutimeve.
“Ambasadorët Vlahutin dhe Lu informuan Kryetarin e Kuvendit z. Meta se pas deklaratës së z. Basha, ambasadorët nuk e kanë të mundur të marrin pjesë në negociatat e parashikuara për 18 korrik. Z. Basha foli për një qeveri teknike dhe nuk e përmendi propozimin hibrid që ai diskutoi me Ambasadoren Nuland më 10 korrik. Nëse z. Basha e rideklaron angazhimin e tij të mëparshëm për të negociuar ekskluzivisht mbi bazën e propozimit hibrid, vetëm atëherë ambasadorët do t’u bashkohen këtyre diskutimeve”, deklarojnë ambasadorët.
Kreu i PD-së, Lulzim Basha deklaroi sot se krijimi i një qeverie teknike për organizimin e zgjedhjeve të lira e të ndershme është e vetmja rrugë në kushtet e degradimit të qeverisjes. Ai tha se PD është e gatshme të negociojë zgjidhje që mundësojnë plotësisht rolin më aktiv të ndërkombëtareve në përputhje të plotë me rekomandimet e Komisionit te Venecias
“Partia Demokratike dhe unë e kemi konsideruar dhe e konsiderojmë krijimin e një qeverie teknike si një domosdoshmëri për organizimin e zgjedhjeve të lira e të ndershme dhe për stopimin e krizës së gjithanshme të vendit. Nga kjo pikëpamje në emër të Partisë Demokratike dhe opozitës mirëpres qëndrimin e djeshëm të kryetarit te LSI Ilir Meta për krijimin e një qeverie teknike për organizimin e zgjedhjeve të lira në vend.
PD është e gatshme të marrë pjesë në këtë format takimi, të ekspozojë pa asnjë paragjykim apo prapamendim bazën ligjore të propozimeve të saj për vetingun, të negociojë zgjidhje që mundësojnë plotësisht rolin më aktiv të ndërkombëtareve në përputhje të plotë me rekomandimet e Komisionit te Venecias”, deklaroi Basha.
