“Reforma në drejtësi nuk ka nevojë për deklarata elektorale. Kjo reformë kërkon gjithpërfshirje të shqiptarëve, të çdo faktori politik dhe opozitës, e jo perjashtime siç ka bërë deri tani dhe siç po vazhdon të bëjë Rama”, ka deklaruar kryetari i Partisë Demokratike, Lulzim Basha pas deklaratave të kryeministrit Edi Rama se do të pranojë çdo propozim të PD me kusht që ta prnaojnë ndërkombëtarët..
Në vijim, Basha shprehet se “Është e vështirë t’i besosh një njeriu që një herë thotë , Reforma e Drejtesisë do të kalojë pa opozitën, pastaj kërcënon se “do ta votoni me një këmbë”, pastaj tenton planin e blerjes se mandateve, pastaj plane te tjera B, C, D…e tani lëshohet në ekstremin tjeter: “shkruajeni vete si të doni ” duke përjashtuar Partinë Socialiste nga përgjegjësia. Me këtë deklaratë ai vetem sa fakton se asnjëherë nuk e mori seriozisht reformën në drejtesi por e trajtoi prej ditës se parë si instrument pushteti, për larje llogarish dhe intriga politike”.
“Nuk kam pranuar që në fillim, dhe nuk do te pranoj as sot, as nesër që drejtesia të trajtohet si plaçkë për të mbyllur pazare apo për të bërë kalkulime për hir të karriges. PD dhe opozita është angazhuar me seriozitet që ditën e parë, duke kërkuar konsensus, duke ofruar zgjidhje, duke qendruar fort në parimet dhe rekomandimet e Venecias. Sepse qëllimi ynë i vetem është një reformë që t’i shërbejë shqiptarëve dhe Shqipërisë sot dhe në dekadat që vijnë, dhe jo orekseve të ditës, skemave, intrigave dhe kurtheve për pushtet, tha Basha.
Basha thekson se “Opozita e ka shkruar propozimin me kaligrafi dhe përmbajtje te Venecias, dhe Rama e ka mbi tryeze. Ta votojmë, e shqiptareve dhe aleatëve qe po kërkojnë konsensusin tash sa kohe, tu japim lajmin e mirë!”.
