Nga Boldnews.al
Me profesion gazetar, italiani i natyralizuar Carlo Bollino shfrytëzon mediat e tij për të bërë herë pas here qoka ndaj pushtetarëve të majtë. Rasti më i fundit ishte sot paradite, ku Shqiptarja.com shkruante se në aeroportin e Rinasit kishte fluks qytetarësh që prisnin në radhë. Madje për t’i dhënë peshën e duhur, kjo media “e pavarur” vendos edhe foton e kryetarit të Bashkisë së Tiranës, Erion Velaj duke pritur në radhë si të tjerët.
Por në fakt i gjithë ky lajm ishte një inskenim i realizuar nga Carlo Bollino dhe bashkëshortja e tij Alba Malltezi, të cilët sapo ishin kthyer bashkë me kryebashkiakun Erion Veliaj nga një udhëtim në Verona të Italisë.
Me të zbritur në aeroportin e Rinasit, Bollino i mërzitur se përse kryebashkiaku Veliaj po mbante radhë, shkrep një foto dhe ia nis redaksisë së tij të Shqiptarja.com për strukturuar lajmin. Natyrisht stafi i kësaj gazete e ka parasysh se lajmi nuk duhet të ishte për hallin e qytetarëve dhe kaosin e krijuar në Rinas, por sesi kryebashkiaku Veliaj po mbante radhë si gjithë të tjerët.
“Në këtë pritje, që për udhëtarët është e patolerueshme, ka qenë edhe kryebashkiaku i Tiranës, Erion Veliaj i cili preferon të presë në radhë bashkë me qytetarët duke mos zgjedhur kështu kushte më komode.” – shkruante Shqiptarja.com
Ky lajm mesa duket është porositur nga vet stafi i “marketingut” të Veliajt, të cilët ia kanë propozuar si ide Bollinos. Natyrisht italiani nga Puglia e ka pranuar me kënaqësi që t’i shërbejë pushtetit, pasi përfitimi do të jetë i ndërsjelltë.
Boldnews.al mëson gjithashtu detaje të reja nga vizita në Itali e Carlo Bollinos dhe Erion Veliajt. Burime konfidenciale nga Bashkia e Tiranës, bëjnë me dije se Bollino i shoqëruar nga bashkëshortja Malltezi kanë vizituar Venecian bashkë me kryebashkiakun Erion Veliaj. Pjesë e “delegacionit” të Veliajt kanë qënë edhe gazetarë të tjerë.
Lidhjet mes Bollinos dhe Veliajt nuk janë vetëm për marketing politik. Më herët, Boldnews.al zbuloi një aferë të errët për trajtimin e mbetjeve urbane dhe pastrimin e Tiranës. Hapat e para të këtij skandali janë hedhur gjatë vizitës në Verona, ku Bollino në rolin e negociatorit ka marrë pjesë në takimin me kryebashkiakut të Tiranës Erion Veliaj dhe atij të Veronës, Flavio Tosit. Të dy këta nënshkruan një memorandum për dhënien me konçesion pastrimin e Tiranës.
