Katër doganierët shqiptarë që u arrestuan 4 ditë më parë në Greqi, janë lënë të lirë sot nga autoritetet greke. Ka qenë prokuroria greke ajo që kërkoi lirimin e tyre të menjëhershëm nga burgu, pasi nuk kishte asnjë provë që i implikonte ata në rastin e kontrabandës, arsye për të cilën u arrestuan. Pas kërkesës së Prokurorisë, gjykata ka vendosur lirimin e tyre.
4 doganierët u arrestuan nga policia greke më në Kallpaq, pranë Kakavijës në momentin kur autoritetet greke zbuluan mallra të vjedhura në dy kamionë.
Autoritetet greke thanë se në datën 30 qershor, në mbrëmje, janë pikasur në aksin Konicë-Janinë, 2 kamionë dhe 1 automjet teksa lëviznin në mënyrë të dyshimtë.
Gjatë ndjekjes është ndaluar mjeti ku udhëtonin 4 doganierët, ndërsa drejtuesit e kamionëve i braktisën ato dhe u larguan me vrap. Policia greke tha se 4 doganierët ishin shoqërues të kamionëve.
Brenda kamionëve u gjetën dhe sekuestruan: Dy mjete bujqësore, motor trajleri, pajisje ndërtimi, një sasi e madhe pajisjesh elektroshtëpiake të vjedhura në Greqi. Në mjetin e doganiereve u gjetën: 6 pajisje dixhitale magazinimi, 830 euro, 20.000 lekë të reja, 7 celularë, laptop dhe dokumente të ndryshme. Nga hetimet rezulton se mjetet e sekuestruara në kamionë janë vjedhur në Athinë.
