Nisur edhe nga sulmet terroriste të ndodhura tri ditë më parë në aeroportin “Ataturk”, në Stamboll, pasagjerët që ndodheshin në avionin që do të niste fluturimin drejt Vjenës së Austrisë përjetuan momente ankthi dhe tensioni gjatë e pasi ndodhi grabitja vetëm pak metra larg tyre.
Paniku u krijua fillimisht nga të shtënat me armë në ajër nga ana e autorëve që realizuan grabitjen e mbi 3 milionë eurove, më pas edhe nga vonesa e nisjes së fluturimit.
“Panorama” shkruan se në avionin që pritej të nisej drejt Austrisë ndodheshin të paktën 150 pasagjerë, që kanë përjetuar momente ankthi.
Të shtënat me armë kanë krijuar panik në bordin e avionit dhe pasagjerët pa e ditur se çfarë po ndodhte, me të drejtë janë tensionuar. Burime nga Aeroporti i Rinasit thanë se për shkak të ngjarjes që ndodhi brenda në pistën e avionëve, fluturimi drejt Vjenës nuk nisi në orarin e përcaktuar.
Pasagjerëve iu desh të prisnin për shumë minuta, derisa nga kulla e kontrollit të jepej sinjali për nisjen e fluturimit. Burimet thanë se udhëtarët janë sqaruar në kohë për shkaqet e vonesës dhe u është kërkuar që të ruajnë qetësinë, pasi ajo që kishte ndodhur nuk cenonte sigurinë e tyre. Me avionin ku ndodheshin 150 pasagjerë do të transportoheshin drejt Austrisë miliona euro të një banke të nivelit të dytë në Tiranë, para që tashmë janë në duart e grabitësve dhe nuk u arrit të dërgoheshin në destinacion.
Lajmet e tjera për grabitjen ne Rinas
