LSI njoftoi sot se ka përjashtuar nga grupi i saj deputetin Përparim Spahiu për shkak se ato binin kundër qëndrimeve parimore të LSI.
Kryetari i Grupit të LSI, Petrit Vasili, deklaroi para mediave se “Grupi parlamentar i LSI vendosi përjashtimin e deputetit Përparim Spahiu si anëtar i grupit parlamentar të LSI për shkak të qëndrimeve personale të përsëritura të cilat nuk kanë qenë në pajtim me vendimet e Kryesisë dhe grupit parlamentar të LSI.
Qëndrimi më i fundit personal i deputetit Spahiu që lidhet me reformën në drejtësi u vlerësua si i gabuar dhe i nxituar, njëkohësisht në kundërshtim të plotë me qëndrimet tepër parimore dhe koherente të LSI për reformën në drejtësi.”
Por, theksoi Vasili, “LSI vlerëson rëndësinë e jashtëzakonshme të Reformës në drejtësi jo vetëm për forcimin e shtetit ligjor por dhe si gjendje që lidhet me forcimin e sigurisë kombëtare dhe qëndrueshmërinë vendit ndaj LSI do të vazhdojë në mënyrë konseguente të punojë për miratimin e Reformës në drejtësi sipas standarteve të Venecias larg emocioneve dhe llogarive afatshkurtra.”
I pyetur nga gazetarët për zgjedhjen e Presidentit nga populli, sipas nismës së grupit “Blushi”, Vasili tha dakord në parim, kurse për idenë e një referendumi për reformën, ai tha se “për referendumin, gjendja është delikate, duhet të jemi të kujdesshëm, se këto referendume për shkak të numrave të vegjël të deputetëve apo nismëtarëve nisur dhe nga emocionet elektrorale, nxisin stabilitet, qëndruehsmëri apo krijojnë paqendrueshmëri të tjera?!”
