Qeveria ka akorduar 337 milionë lekë për rindërtimin e banesës ku u ngrit flamuri i Republikës së Korçës. Godina e shkatërruar disa vite më parë, do të ringrihet nga fillimi, dhe do të përurohet në muajin dhjetor të këtij viti, kur do të mbushen edhe 100 vite nga ngritja e flamurit në Korçë.
Pas VKM-së për shpronësimin e familjes, Ministria e Kulturës ka hapur tenderin në Agjencinë e Prokurimit Publik. Sipas dokumenteve, godina e quajtur “Banesa e Flamurit”, u ndërtua në vitin 1884 dhe ishte nga të parat banesa të reja të asaj kohe, që formuloi deri diku bulevardin e vetëm të qytetit; i quajtur sot “Bulevardi Shëngjergji”, pronë e familjes Sugari. Në zonën e ndërtimit të saj, banesa ishte e vetmja godinë, e cila kishte një ballkon që shihte nga bulevardi.
Rrjedhojë e kushteve politike e shoqërore të asaj kohe, dhe si rezultat i veprimtarisë patriotike atdhetare, Themistokli Gërmenji, veprimtar i shquar, në 10 tetor 1916, në ballkonin e kësaj shtëpie ngre dhe valëvit flamurin e formimit të Republikës autonome të Korçës, veprim me rëndësi historike për identitetin tonë kombëtar.
Më vonë aty kanë pasur seli, forcat ushtarake franceze që morën pjesë në Luftën e Parë Botërore. Në vitin 1920 po në këtë godinë historike, ngrihet flamuri shqiptar për herë të dytë në këtë ballkon nga patrioti i shquar Vasil Tromara, kohë në të cilën Korça ishte tashmë e bashkuar me qeverinë e Tiranës. Një veprim tepër patriotik vulosi pavarësinë dhe u dha fund pretendimeve territoriale për Korçën.
Pas Luftës së Dytë Botërore, godina shërbeu si objekt në shërbim të administratës shqiptare, si gjendje civile etj. Në vitin 1977 kjo banesë shpallet “monument kulture” i kategorisë së I. Rikonstruksioni i saj i jep funksionin e Muzeut Historik të Korçës, i cili funksionoi deri në fillim të viteve 90´. Më pas e deri në ditët e sotme, objekti nuk ka pasur funksion dhe ka pësuar amortizim dhe degradim gjatë kohës. Banesa u është kthyer pronarëve të saj, familjes Sugari, ndërsa është shpronësuar.
