Deputeti socialist Pandeli Majko deklaron se sot është shansi i fundit për kompromis lidhur me reformën në drejtësi dhe nëse nuk ndodh kjo, atëherë do të ketë zgjedhje të parakohshme por edhe vendi do të hyjë në karantinë mbi 3-vjeçare si shtet i dështuar.
STATUSI I MAJKOS NË FACEBOOK
Sot “Dita D” e Reformës së Drejtësisë.
Në se nuk duan kompromisin që kemi ofruar dhe ofrojmë.
Në se nuk pranojnë të shkojmë me alternativa në popull që ai të vendosë me referendum.
Në se nuk do të pranohen sot zgjidhjet e ofruara nga ekspertiza ndërkombëtare.
Në se njëra nga këto alternativa nuk ndodh… Shkojmë drejt Zgjedhjeve të Parakohshme pa zgjidhje. Shqipëria hyn në “karantinë” mbi 3 vjecare si shtet i dështuar. Rrugët e integrimit europian të vendit mbyllen. Shoqëria shqiptare do të degradojë në një shoqëri mafioze me apo pa Partinë Socialiste në pushtet.
Përballë këtij realiteti cinik shpresoj të marrë fund alternativa opozitare se partitë duhet të emërojnë dhe kontrollojnë gjykatësit dhe prokurorët.
Në se reforma nuk votohet për këtë arsye atëherë më mirë një dështim se sa një mashtrim.
Të “kapësh” Shqipërinë me arsyetimin se të tjerë duan të “kapin” drejtësinë është një kalkulim i gabuar politik.
Një Shqipëri e dështuar dhe pronë e politikanëve është një eksperiment i provuar në historinë e vendit tonë.
Shpresoj deri në fund për kompromisin. Shqipërisë i kemi borxh të ardhmen. Zoti na ndihmoftë!
