Një javë pas inaugurimit të Këndit të Lojërave në Parkun e Liqenit Artificial të Tiranës, Drejtori i Agjencisë së Parqeve dhe Rekreacionit në Bashki, Blendi Gonxhe, i ka bërë një “dhuratë” vetes. Ai ka bërë letrat dhe ka bërë gati tenderin për mobilimin e zyrës së tij, që ndodhet në rrugën “5 maj” në Tiranë.
Boldnews.al ka siguruar dokumentet e një tjetër tenderi që ka bërë Bashkia e Tiranës, për të përmirësuar, jo shërbimin ndaj qytetarëve, por luksin apo komoditetin e tyre brenda zyrave. “Bashkia ka akorduar një fond limit prej 10 milionë lekësh (të vjetra). Burimi i financimit janë të ardhurat e vetë bashkisë, ndërsa objekti i kontratës/marrëveshjes është në kuadër pë blerje pajisje e orendi zyre” thuhet në këto dokumente.
Sipas dokumenteve, është tenderuar një sirtarier, e cila është e përmasave 45 cm x 50 cm x 60 cm. Struktura e sirtarierit është i përberë nga material melamine me trashësi 18 mm. Sirtarieri është i ndarë në tre sirtarë të barabartë, me mbyllje me çelës qendror. Sirtarët duhet të rrëshqasin mbi shina metalike me rrota najloni me kushinetë të inkastruar.
Do të blihet një dollap me katër kanata, me lartësi 200 cm, gjerësi 90 cm dhe thellësi 45 cm. Pjesa e sipërme dhe pjesa e poshtme është me kapakë material mdf spesor 18 mm e plastifikuar me pvc dhe me gjatësi 80 cm. Në tender është kërkuar edhe një dollap tip etazher, me lartësi 200 cm, gjerësi 90 cm dhe thellësi 45 cm. Është kërkuar një tavolinë ne forme L me 7 poste, sërish një tavolinë tjetër në forme L me 6 poste pune.
Agjencia e Parqeve dhe e Rekreacionit ka kërkuar të blejë me fondin 10 milionë lekë edhe një poltron rrotullues, me komfort të lartë. “Ndenjësja dhe shpinorja e poltronit përbëjnë një strukturë të pandashme që duhet të jetë solide e pa deformueshme” thuhet në dokumente, e cila mesa duket do të jetë poltroni i kreut të kësaj Agjencie, Blendi Gonxhes.
Mbështetëset e krahëve janë të përbëra nga strukturë e qëndrueshme me plastikë të fortë. Gjithë struktura duhet të jetë e rrotullueshme mbi aksin qendror, i cili montohet mbi një bazament në formë ylli prej materiali plastik të fortë, ose metalik, me 5 rrota cilësore, qe lëvizin lehtë dhe mbrojnë sipërfaqet e dyshemesë ndaj gërvishtjeve. Në fund, është kërkuar edhe rafte metalike të hapura për magazinë.
Njoftimi i kontrates APP mobilje
(Boldnews)
