Reforma në drejtësi ka shkaktuar një “tërmet” të fuqishëm brenda Partisë Demokratike, ku deputetë të kësaj force politike janë shpërqëndruar dhe situata duket sikur u ka dalë jashtë kontrollit.
Goditja që i dha Ambasada Amerikane dhe Bashkimi Europian Partisë Demokratike dhe në veçanti lidershipit të saj, ka bërë që deputetë demokrat të rishikojnë pozicionin e tyre.
“Ambasada e Shteteve të Bashkuara shpreh zhgënjimin e saj që takimi i 6 qershorit mes kryeministrit Rama dhe liderit të opozitës Basha nuk arriti një vendim përfundimtar mbi reformën në drejtësi. Qeveria shfaqi fleksibilitet, por në fund opozita nuk bëri të njëjtën gjë. Do të jetë përgjegjësia e anëtarëve individualë të Parlamentit të vendosin nëse duan të mbajnë sistemin e sotëm të drejtësisë të korruptuar dhe të politizuar, apo nëse do ta mbështesin këtë reformë” – shprehet në qëndrimin e saj Ambasada Amerikane duke frymëzuar deputet demokratë që të dalin kundër partisë së tyre.
48 orët e fundit po qarkullojnë zëra se një grup prej 4-5 deputetësh të ngjashëm me Lëvizjen e Mendimit Ndryshe në PS të pak viteve më parë, pritet të votojnë reformën në drejtësi. Kjo do t’i kushtojnë mandatet atyre, pasi kryedemokrati Lulzim Basha është shprehur i qartë për këdo që “tradhëton” qëndrimin e partisë.
“Nëse edhe një deputet i opozitës voton një draft pa konsensus, PD kalon në përballje totale, përfshirë edhe djegien e mandateve derisa të zhvillohen zgjedhje të lira e të ndershme”– ka deklaruar kreu i demokratëve.
Burime për Boldnews.al bëjnë me dije se një variant që po qarkullon si skenar është se grupi i deputetëve “rrebelë” që mund të përjashtohen nga Partia Demokratike pas votimit të reformës në drejtësi, pritet t’i bashkohen Frymës së Re Demokratike.
Rikthimi i këtyre deputetëve në selinë e vjetër të Partisë Demokratike, por që tani është zyra e FRD, duket se e la të hapur si mundësi edhe kryetari Bamir Topi. Ky i fundit pritet të nis një seri takimesh ditët në vijim me deputetë-veteranë të Partisë Demokratike për t’i ftuar në partinë e tij, nëpërmjet skenarit të votimit të reformës në drejtësi.
Këta deputetë që pritet të dalin kundër Lulzim Bashës njihen si ish-mbështetës të të ndjerit Sokol Olldashi dhe sipas burimeve brenda Partisë Demokratike me shumë gjasa ata nuk do të jenë në listat zgjedhore të 2017.
Kalimi i këtyre deputetëve në Frymën e Re Demokratike nëpërmjet një kauze si reforma në drejtësi, do të rriste shanset për forcuar këtë parti por edhe për të hyrë sërish në parlament.
Kjo krizë brenda Partisë Demokratike që ka filluar të ndjehet prej kohësh do të venisë edhe më tej shpresat për rikthimin në pushtet. Pas 3 javësh do të jetë prova vendimtare për lidershipin e PD, pasi pritet të votohet reforma në drejtësi.
Të enjten, reforma në drejtësi u fut në heshtje në kalendarin 3-javor të punimeve të kuvendit dhe fund qershori parashikohet si afati i mundshëm për miratimin e saj.
Duke filluar nga 13 qershori deri me 1 korrik, deputetët në Kuvend kanë afat të diskutojnë dhe të miratojnë paketën e ndryshimeve kushtetuese për reformën. Fillimisht ajo do të kalojë për rishqyrtim në Komisionin e Ligjeve.
Por vendimi duket se ka qenë i njëanshëm, pasi PD në një reagim të saj thotë se nuk ka dijeni për futjen e reformës në drejtësi në kalendarin 3 javor të punimve të Kuvendit nga Konferenca e Kryetarëve.
“Drafti ka kaluar ilegalisht në Konferencën e Kryetarëve. Drafti ka kaluar në fshehtësi, pa dijeninë tonë. Paketa jo në kalendarin që na u vu në dispozicion.Ky është skandal, do e ndjekim.” – u shpreh kryetari i grupit parlamentar të PD, Edi Paloka.
