Ford ka paralajmëruar tërheqjen e rreth 1.9 milion automjeteve në Amerikën e Veriut për të zëvendësuar airbegët e parregullt në anën e bashkë-shoferit të prodhuesit japonez Takata.
Kjo është vetëm një pjesë e tërheqjes ndërkombëtare për airbegët Takata, e cila tashmë është tërheqja më e madhe në historinë e Shteteve të Bashkuara të Amerikës (SHBA).
Disa airbegë të Takata-s mund të fryhen më shumë se ç’duhet dhe të shkaktojnë shpërthimin e saj, gjegjësisht shpërndarjen e “copëzave” në automjet. Deri më tani janë regjistruar të paktën 11 të vdekur të shkaktuara nga ky problem.
Tërheqja e Ford ka të bëjë me automjetet e mëposhtme: Ford Edge (2007-2010), Ford Fusion (2006-2011), Ford Mustang (2005-2011), Ford Ranger (2007-2011) Lincoln MKX (2007-2010), Lincoln MKZ (2006-2011), Zephyr (2006 -2011) dhe Mercury Milano (2006-2011).
Ford theksoi se do të njoftojë konsumatorët me kohë se kur mund të bëjnë zëvendësimin e airbegëve pa pagesë.
