“Pranverës ekonomike të qeverisë i ra dje një tjetër breshër, duke hedhur poshtë propagandën fodulle të saj. Sondazhi i Dhomës Amerikane të tregtisë tregon rënien e besimit të biznesit me 4.83 pikë, për shkak të taksave të rritura, korrupsionit, monopoleve. Të vërtetat e këtij raporti janë tronditëse për gjithkënd”.
Kështu ka deklaruar nënkryetari i PD-së, Edmond Spaho sot, duke shtuas se bizneset amerikane hodhën poshtë propagandën e kryeministrit Edi Rama dhe Ministrit të Financave, Arben Ahmetaj.
“‘Jam tejet i shqetësuar rreth gjetjeve të këtij raporti’,- u shpreh ambasadori amerikan. Po këtë e thotë dhe FMN. E thotë dhe Banka Botërore. E thotë çdo biznes në vend, e çdo investitor. Vetëm Rama e ministrat e tij shprehen se “nuk ka vend për shqetësim pasi gjithçka është një perceptim i gabuar”. Përse shprehen kështu? Sepse ekonomia e tyre personale njeh vetëm pranverë, vetëm lulzim. Çfarë thotë raporti? Nga 27 indikatorë, 24 prej tyre janë në rënie. Dhe kjo është hera e parë që besimi rezulton me rënie, qysh kur dhoma amerikane e tregtisë ka filluar të publikoje këtë indeks”, tha Spaho.
Sipas tij, 65% e bizneseve të Dhomës Amerikane janë shprehur se klima për të bërë biznes është e pafavorshme apo shumë e pafavorshme.
“Burokracia e qeverisë, monopolet dhe konkurrenca e pandershme, niveli i përgjithshëm i taksave, janë tre elementet kryesore qe shqetësojnë bizneset amerikane ne Shqipëri. Me rënie të ndjeshme dhe mjaft shqetësuese rezultojnë marrëdhëniet me tatimet e doganat. 70 përqind e të anketuarve e konsiderojnë nivelin e taksave si të pafavorshëm, ose shumë të pafavorshëm për bizneset. Ky tregues ka shënuar rënien më të madhe nga viti 2014, me pothuajse 7 pikë. Ky është realiteti dramatik i ekonomisë sot, dhe jo propaganda rozë që dëgjojmë çdo ditë nga Ahmetaj dhe Edi Rama”, deklaroi Spaho.
