Inspektorati Kombëtar i Mbrojtjes së Territorit do të prish sot ish godinën e INSIG për të bërë të mundur ndërtimin e Unazës së vogël.
Godina ka një lartësi me disa kate. Nga ana e INSIG pritet të mos ketë kundërshtime.
Para pak ditësh Bashkia e Tiranës fitoi një tjetër betejë ligjore, e cila i hapi përfundimisht rrugën përfundimit të shpejtë të projektit për ndërtimin e Unazës së Vogël. Ajo fitoi gjyqin me pronarët e ndërtesës që njihet ndryshe si INSIG-u, i cili ishte bërë pengesë për vijimin e punimeve dhe përfundimin në kohë të Unazës së Vogël, projekt i cili lehtëson qarkullimin e makinave në qendër.
Gjykata e Apelit e ka vlerësuar të rregullt shpronësimin për interes publik që Bashkia i ka bërë kësaj godine në kuadër të projektit të Unazës së Vogël, duke rrëzuar kështu pretendimet e pronarëve të godinës. Në zbatim të vendimit të Këshillit të Ministrave, godina e INSIG-ut u vlerësua me një vlerë prej 2 milionë euro, ndërkohë që pronarët pretendonin një shumë që shkonte deri në 6 herë më shumë. Vendimi i sotëm i Gjykatës Administrative i hap rrugë përfundimit të shpejtë të punimeve për ndërtimin edhe të segmentit nga pallati i ish-INSIG-ut deri te Bulevardi Zogu i Parë.
Ndërkaq, 3 segmentet e tjera të Unazës së Vogël kanë përfunduar me kohe nga Bashkia e Tiranës dhe janë në funksionim të një qarkullimi më të lirshëm të automjeteve.
