Unioni Afrikan ka 54 shtete anëtare. Në fakt, 55: Muajin tjetër, Haiti do të bëhet zyrtarisht anëtare e tij.
Po, Haiti, në Karaibe, do të bëhet pjesë e Afrikës. Do të jetë vendi i parë joafrikan që do t’i bashkohet bllokut të Unionit Afrikan, shkruan Globalpost.
Kulturarisht shumë njerëz mendojnë se ata janë bashkuar tashmë.
“Haiti gjithmonë e ka quajtur veten një copë e vogël Afrike në Karaibe, kështu që tani u mbetet vetëm të bëhen edhe zyrtarisht,” tha Garrye Pierre-Pierre, botuesi i Haitian Times me qëndër në Bruklin.
“Ne kemi shumë të përbashkëta si nga kultura afrikane, ashtu dhe nga ritet fetare. Kur unë jetoja në Afrikën Perëndimore, ajo më kujtonte aq shumë Haitin. Ishte e çuditshme,”.
Përfitimi kryesor për Haitin në Unionin Afrikan do të jenë lidhjet ekonomike.
“Haiti synon të zhvillojë shumë industri dhe turizmi është një prej tyre, – tha Pierre-Pierre, ish-gazetari i “New York Times. – Unë mendoj se ka shumë mundësi për tregti, për lëndë të para që janë të shumta në Afrikë. Punohet me dy mënyra: Ndërsa Afrika zhvillon industritë dhe është në kërkim të tregjeve, edhe Haiti do të jetë një prej tyre,” tha ai.
Përtej fijeve ekonomike që i lidhin, bashkimi i Haitit me Unionin Afrikan është për shumicën e haitianëve një hap simbolik, se bashkimi ishte diskutuar prej vitesh. Pierre-Pierre mendon se pas 20 vjetësh, haitianët do të kthejnë kokën mbrapa për këtë vendim dhe do të thonë: “Ç’vendim i shkëlqyer që ishte!”
