Altin Hajri nga Shijaku, i konsideruar nga autoritetet italiane si një ndër bosët e narkotrafikut në Venecia, papritur rezulton se ka qenë një emigrant i rregullt.
Ai fillimisht u dyshua se, bashkë me disa të tjerë, kanë qarkulluar miliona euro nga aktiviteti i paligjshëm i drogës. Madje, ndaj tij dhe vëllait të tij, të dy pronarë te kompleksit “Golden” në Shijak, Durrës, u lëshua para disa muajsh urdhër-arresti ndërkombëtar. Policia Shqiptare, gjithnjë e prirur për të përvetësuar si sukses të saj çdo hetim ndërkombëtar, e transmetoi në Shtator 2015 si arritje sekuestrimin e kompleksit të vëllezërve Hajri. Për njohësit e legjislacionit penal, në raste të tilla Policia vendos vetëm shiritat e bllokimit, në bazë të urdhërit të Gjykatës, ndërkohë që detyrën e saj, arrestimin e personave në kërkim, në këtë rast nuk e realizoi.
Gjithësesi, ndërkohë që vijonte të jetë në kërkim nga Policia shqiptare për llogari të autoriteteve italiane, Interpol Roma ka hequr nga sistemi i kërkimit Altin Hajrin. Një vendim i Gjykatës së Venezias ka rrëzuar të gjitha provat e prokurorisë dhe policisë së shtetit fqinj ndaj tij. Ky mund të konsiderohet një dështim spektakolar i drejtësisë italiane, por nuk është i vetmi.
“Boldnews.al” raporton se dështime të tilla të bujshme ka pasur në vitin 2015 edhe për të paktën dy raste, kur qytetarë shqiptarë, një nga fshatrat e Kavajës dhe një tjetër nga zona rurale e Lushnjes, akuzoheshin për lidhje me terrorizmin fetar.
Nga ana e Policisë Shqiptare u arrestuan për llogari të italianëve në dy çështje të veçanta Baki Çoku dhe Alban Elezi. Nga pamjet filmike të Policisë Shqiptare, pas arrestimit të tyre, dukej qarte se këta dy persona, në varfëri ekstreme dhe me nivel arsimor e intelektual shumë të ulët, nuk mund të kishin asnjë mundësi reale të bindnin, rekrutonin dhe të dërgonin shqiptarë të tjerë për të luftuar në krah të Shtetit Islamik në Lindje e Mesme.
Megjithatë, autoritet italiane kërkonin ekstradimin e tyre, pasi kishin prova se ishin të përfshirë në veprimtarinë ndihmëse të terrorizmit.
Nën ethet e koalicionit ndërkombëtar kundër terrorit, autoritet shqiptare vepruan me shpejtësi dhe realizuan ekstradimin e tyre.
Por, rreth 3 muaj pasi ata gjendeshin në izolim në Itali, autoritetet e vendit fqinj dërguan shkresë “lutëse” në Shqipëri, ku kërkohej që, nëse kishin prova për aktivitetin terrorist të Baki Çokut dhe Alban Elezit, t’ua dërgonin sa më shpejt. Sipas autoriteteve hetimore italiane, gjykatat e tyre nuk u kishin pranuar provat dhe Çoku e Elezi “rrezikoheshin” të liroheshin. Në fjalë më të thjeshta, pretendimet e tyre për lidhjet e dy fshatarëve shqiptarë të lidhur me terrorizmin, ishin rrëzuar plotësisht.
Këto dy raste përbëjnë tjetër dështim spektakolar të autoriteteve italiane, të cilat, nëse do të kishin ndodhur në Shqipëri, do të kishin pasoja shumë të rënda.
Në fakt, ndërmjet Shqipërisë dhe Italisë ka problem të theksuara me ekstradimet, po aq sa ka edhe bashkëpunim me volumin më të lartë në këtë drejtim.
“Boldnews.al” ka mësuar nga personat përgjegjës në Ministrinë e Drejtësisë se shqetësimet në këtë drejtim u janë bërë të ditur edhe autoriteteve italiane.
Ministria e Drejtësisë konstaton se në disa raste autoritetet italiane i kanë dërguar asaj kopje të kërkesës për ekstradim nëpërmjet postës elektronike, pra, jo në formën e kërkuar nga ligji. Po ashtu, Ministrisë së Drejtësisë i dërgohen kërkesat nga ana e autoriteteve italiane përtej afatit 40-ditor, të përcaktuar në Konventën Evropiane për Ekstradimin dhe legjislacionin penal shqiptar. Për “Boldnews.al”, burimet kompetente në Ministrinë e Drejtësisë shprehen se kjo situatë ka gjeneruar në praktikë një sërë vështirësish, të lidhura me kryerjen e veprimeve proceduriale si nga ana e Prokurorisë ashtu edhe Gjykatës.
Ministria e Drejtësisë konstaton me shumë shqetësim se, në raste të ndryshme, për shkak të vonesave nga ana e autoriteteve italiane, personat e arrestuar në Shqipëri për efekt ekstradimi, janë liruar pas për shkak të kalimit të afateve proceduriale, janë fshehur e për pasojë nuk është bërë i mundur gjetja dhe dorëzimi i këtyre personave, në rastet kur ekstradimi është miratuar nga Ministri i Drejtësisë.
