Një ndeshje gati të përkryer nga ana e skuadrës bardheblu, në aspektin sportiv, si nuk mbahet mend prej shumë kohësh në derbin e kryeqytetit, kanë mundur ta venisin gati plotësisht dhe në vetëm pak minuta drejtuesit e lartë të Tiranës. Këta të fundit për paaftësi organizative, apo qëllimisht kanë dështuar në përmbushjen e përgjegjësive, madje duke qenë vetë protagonistë të dhunës së ushtruar ndaj drejtuesve të ekipit mik, në mënyrë direkte, apo duke lejuar prezencën në pistë, të disa tifozëve të skeduar, të cilët kanë degjeneruar situatën.
Një shfaqe e shëmtuar, ndaj të cilës, Komisioni i Disiplinës në Federatën Shqiptare të Futbollit sapo ka zbardhur vendimin, sipas të cilit bardheblutë do të ndëshkohen sërish, në kolektiv, por edhe individualisht, financiarisht por edhe nëpërmjet masave disiplinore. Gjithsesi, nuk mund të kalonte pa ndëshkuar edhe klubi i Partizanit, në disa raste protagonist me përfaqësues zyrtarë apo tifozë të kuq, në rolin e provokuesve, apo të dëmtuesve të pronës.
Parimisht, për gjithçka të keqe të shfaqur nga bardheblutë në derbin e të mërkurës përballë Partizanit, Disiplina ka ndëshkuar Tiranën me 8 ndeshje pa spektatorë. Gjithashtu është dënuar me 10 ndeshje pezullim nga aktiviteti, drejtori teknik i bardhebluve, Devi Muka, protagonist kryesor në episodet e dhunës, sikurse dhe drejtori ekzekutiv, Sajmir Shehri është dënuar për mosrespektim të dënimit të mëparshëm, duke iu ndaluar hyrja në stadium, si dhe duke u gjobitur në shumën 500 mijë lekë të rinj.
Partizani u dënua me 200 mijë lek gjobë për dëmet dhe sjelljen e tifozëve. Nga ana tjetër, klubi i Partizanit u dënua me gjobë 200 mijë lekë për sjellje të gabuar të spektatorëve duke dëmtuar stolat e stadiumit, hedhur flakadanë dhe stola ne fushën e lojës, ndërsa zyrtari i klubit të kuq, Amarildo Dajlani,për sulm ndaj kundërshtarit, është dënuar njëlloj si Muka, me 10 ndeshje pezullim nga aktiviteti. Ndërkohë komisioni ka rrëzuar kërkesën e Partizanit për fitimin e ndeshjes në tavolinë.
