Elton Çiça, viktima e atentatit të së dielës së shkuar në zonën e ish-Bllokut në Tiranë, ka pasur miqësi me oficerin e Policisë së Komisariatit nr. 5 në Tiranë, Alban Trimi, i cili gjendej me të në tavolinë në momentin e ekzekutimit.
Ky fakt pranohet nga ana e Prokurorisë së Tiranës, e cila ka prezantuar gjatë seancës për masën e sigurimit ndaj oficerit Trimi, i dyshuar se ka fshehur pistoletën që mbante me vete viktima në momentin e atentatit.
Sipas Prokurorisë së Tiranës, ndaj Trimit ishte nxjerrë urdhër ndalimi pak orë pas ngjarjes, por ai nuk është gjetur për dy ditë rresht. Nga dokumenti i prokurorisë rezulton se oficeri i policisë, Alban Trimi, gjatë dy ditëve që kërkohej nga kolegët e tij, ka qenë në Tepelenë, dhe ka marrë pjesë ne ceremoninë e varrimit të viktimës Elton Çiça.
Alban Trimi është pyetur në momentin e parë nga ana e policisë mbi njohjet me viktimën dhe ka deklaruar se nuk kishte asnjë njohje. Sipas tij, ai ka qenë ulur në një tavolinë të lokalit “De Niro” me një gazetar dhe pranë tyre është afruar një i njohuri i tyre, me profesion dentist. Ky i fundit, i cili rezultoi të jetë Redi Rrenja, gjithashtu i arrestuar për fshehje të provave, ka qenë i shoqëruar me një person, për të cilit si polici, ashtu edhe gazetari kanë deklaruar se nuk e njihnin.
Sipas deklarimeve të para të dëshmitarëve okularë në Polici, ata kanë treguar se rreth 10 minuta pasi ishin ulur në tavolinë, një person hyn me pistoletë në dorë dhe qëllon dy herë në drejtim të Elton Çiças, duke e lënë të vdekur. Dëshmitarët e pranishëm në tavolinë kanë thënë se nuk e njihnin viktimën dhe se aty ka qenë rastësisht. Por, fakti që polici Alban Trimi ka qenë i pranishëm në ceremoninë mortore të viktimës Elton Çiça, krijon dyshimet se ai ka gënjyer dhe se njohja e tyre ka qenë më e hershme se sa ajo e takimit “rastësor” në lokal.
