Hakmarrja mësohet të ketë qenë motivi kryesor që i morri jetën 36 -vjeçarit, Elton Çiça, mbrëmjen e djeshme në një lokal në Tiranë pranë shkollës 9-vjeçare “Emin Duraku”, në zonën e stadiumit “Selman Stërmasi”.
Nga grupi hetimor që po zbardh ngjarjen mësohet se ata po e drejtojnë pistën kryesore tek një sherr i mëparshëm që viktima ka pasur me atentatorin.
Elton Çiça u vra mbrëmjen e djeshme në orën 22 e 20 me dy plumba në kokë në mes të një lokali.
Burime ende të pakonfirmuara bëjnë me dije se ngjarja e sotme ka nisur më shumë se një vit më parë në Tepelenë. Ngjarja e raportuar nga media për dhunimin e një çifti të moshuar (viktima eshte djale i tyre) përfundoi ne faqet e shtypit.
Elton Çiça duket të jetë hakmarrë për dhunimin barbar të prindërve të tij të moshuar dhe më pas agresoret e kanë qëlluar sot atë me armë duke i shkaktuar vdekjen.
Policia po heton ende për shkaqet e ngjarjes që çuan në tragjedinë e sotme.
Lidhja me bombën e ushtarakut në Kombinat
Vrasja e djeshme ka lidhje edhe me një ngjarje të ndodhur pak kohë më parë në Kombinat, ku ushtarakut Elton Imeri i vunë bombë në makinë. Edhe atëherë, hetimet për shpërthimin në makinën e oficerit të policisë ushtarake Elton Imeri në Kombinat u përqendruan në pistën e hakmarrjes.
Kjo pasi nga verifikimet e Prokurorisë e Policisë, ka rezultuar se në muajin Korrik të vitit të kaluar, vëllait të oficerit, shtetasit Ervis Imeri, i kanë vendosur tritol poshtë makinës ‘Fiat’ në të njëjtën mënyrë në Tiranë. Dyshohet se pasi kanë dështuar me atentatin ndaj Ervis Imerit, i cili e zbuloi bombën nën makinën e tij, autorët e ngjarjeve kanë dashur të hakmerren ndaj ushtarakut Elton Imeri, duke u vendosur bombën nën makinën ‘Golf 4’. Vëllai ushtarakut shtetasi Ervis Imeri, është i dyshuar se në 31 Mars, natën, në lagjen “Demokracia” në Tepelenë, bashkë me tre persona të maskuar e të armatosur, me armë dhe me dhunë grabitën shtëpinë e të moshuarit Naim Çiça.
Ervis Imeri është njëri nga katër grabitësit e prindërve të personit që u vra sot, Elton Çica.
