“E ardhmja ime? Kam një kontratë, nuk mund të zgjohem një mëngjes dhe të shkoj në Angli. Pyesni ata që merren me këtë. Për mua futbolli është ai që luhet në fushë”. Këto kanë qenë deklaratat e bëra nga Pogba në intervistën e publikuar dje nga “La Repubblica”.
Fjalë këto që nuk e qetësojnë aspak popullin juventin. Përshtypja është se gjiganti francez kërkon të marrë edhe pak kohë për të kuptuar nëse ka ardhur momenti për t’u larguar nga Italia dhe për të fituar statusin e multimilionerit në një kampionat tjetër. Në fakt, flitet për oferta të çmendura të bëra për mesfushorin e bardhezinjve. Më saktësisht, flitet për kontrata me 10 milionë euro në vit, shifra të pranueshme për klube si Paris Saint Germain, Barcelona, Real Madrid, Bayern Munich, Manchester City, Manchester United dhe Chelsea.
Nga ana e tij, administratori i përgjithshëm i Juventus, Marotta, ka qenë i qartë edhe gjatë festimeve për titullin e pestë radhazi të epokës Andrea Agnelli: “Pogba është e ardhmja jonë, – ka thënë ai. – Duam ta shtrëngojmë fort, ai vetë ka thënë disa herë se ndihet shumë mirë këtu dhe besoj se ka shumë arsye për të qenë optimistë”. Të hënën do të fillojë një javë shumë e rëndësishme në këtë front pasi pritet të zhvillohet takimi me përfaqësuesit e futbollistit. Takim ku Juventus do t’i ofrojë një rritje të ndjeshme të rrogës (6,5 milionë euro në sezon, plus bonuse). “E përsëris, duam të vazhdojmë përpara me Pogba, por është ai që vendos”, ka shtuar Marotta.
Një realizëm i pastër, por në të njëjtën kohë klubi torinez i ka idetë e qarta para takimit me përfaqësuesit e numrit 10 të bardhezinjve. Lojtari nuk do të largohet për një shifër më të ulët se 85 milionë euro dhe ka kohë deri më 22-25 maj për të marrë një vendim, kohë gjatë së cilës lojtarët do të jenë pushim në pritje të grumbullimit me kombëtaret respektive për Europianin që do të fillojë nga qershori i ardhshëm në Francë dhe për Kupën e Amerikës që do të zhvillohet në Amerikë. Drejtuesit e Juventus duan të jenë gati të vihen në lëvizje në rast se lojtari do të vendosë të largohet.
