Është dhënë sot masa e sigurisë nga Gjykata e Tiranës për skemën e mashtrimit me viza kanadeze që bënin shtetaset Luli Makashi dhe Adela Makashin.
Gjykata ka lënë në burg Lutfije (Luli) Makashi ndërsa ka liruar të bijën e saj me “detyrim paraqitje”. Nënë e bijë mashtronin persona duke i zhvatur nga 18 deri në 20 mijë euro se do t`i çonin në Kanada me viza punësimi.
Pas kallëzimit penal të 27 personave në Drejtorinë e Policisë është arrestuar menjëherë Klevis Rreshka dhe pas një bashkëpunimi me autoritetet kanadeze është bërë e mundur dhe arrestimi i Lule dhe Adela Makashi.
Këto të fundit u ndaluan natën e së enjtes, në Rinas, sapo zbritën nga avioni nisur nga Kanadaja.
Ato u arratisën drejt Kanadasë, por shteti kanadez u njoftoi anullimin e vizës 10 vjeçare sapo mbërritën aty.
Luli Makashi 52 vjeç, zotëronte shoqërinë ‘ANDE-LM’ në Tiranë, ku premtonte punësim dhe studim në Kanada, Australi dhe Angli.
