Nuk është e vështirë të gjesh heroinë në një nga njësitë bashkiake më të dendura me popullsi dhe më të varfra në Londër. Shumica më e madhe e saj vjen nga Afganistani.
Në një reportazh të gjatë nga “Vice”, thuhet se një nga grupet kryesore të trafikut të heroinës nga Afganistani për në Evropë, drejtohet nga shqiptarë.
Kur në pushtet ishin talebanët, prodhimi i opiumit dhe heroinës ra ndjeshëm rreth viteve 2000, por tani prodhimi është rritur me 40-fish dhe se në Afganistan ka rreth 4.6 milionë përdorues të drogës, sipas OKB-së.
Megjithatë, jo gjithçka ka shkuar sipas planit, pasi vitin e shkuar prodhimi i opiumit ra me 19% për shkak se një kërpudhë që dëmtoi bimët. Fermerët prodhuan rreth 3 300 tonë opium, shumica e të cilit në Helmand, krahinë jugore e Afganistanit.
Shumica e bimës përpunohet me heroinë në baraka të vogla përgjatë kufirit me Pakistanin. Një kilogram opium kushton rreth 200 dollarë. Në tregun lokal, droga mund të gjendet kollaj dhe shpesh automjetet që shesin produktin nuk kanë targa për t’u identifikuar.
Bosët e vërtetë të drogës janë shtetas turq, ku edhe është kanali kryesor i kalimit të heroinës nga Afganistani në drejtim të Evropës. Shumica e parave të fituara janë investuar në biznese të ligjshme në Turqi, si kazino, etj, citon artikulli një ish-shef policie turke.
“Kohët e fundit, grupet kriminale shqiptare kanë marrë pjesën më të madhe të biznesit të heroinës turke”, thekson reportazhi.
Më pas, droga shpërndahet në kanale të ndryshme në Perëndim. Pas Turqisë, droga kalon në Greqi, Bullgari, Kosova, Shqipëri, Maqedoni dhe vende të tjera, për të vijuar në destinacionin përfundimtar.
