Policia e Durrësit ka reaguar lidhur me denoncimin nga Partia Demokratike për dhunimin e biznesmenit Osman Pana në Sukth nga një bandë e maskuar dhe e armatosur.
“Ka qenë vetëm rrahje me shkopinj”, ka sqaruar policia duke thënë se nuk ka pasur asnjë denonim për ngjarjen në fjalë.
Ndërkohë që pas hetimeve, janë identifikuar edhe përgjegjësit dhe kanë shpallur në kërkim. Kreu i Departamentit të Rendit e Sigurisë në PD, Enekeleid Alibeaj, deklaroi gjatë një prononcimi për media se një bandë e armatosur me kallashnikov dhe me maska ka dhunuar biznesmenin Osman Pana, në orën 6:30 të mëngjesit në mes të Sukthit.
Ai akuzoi kryetarin e bashkisë Vangjush Dako dhe kryeministrin Rama si të lidhur me këtë bandë, që i kanë shërbyer në zgjedhje.
Nga ana tjetër, policia thotë se Osman Pana është dhunuar nga 2 persona që janë shpallur në kërkim si pasojë e një konflikti që ka ndodhur mes fqinjëve për shkak të një ndërtimi në katin e dytë në banesën e biznesmenit.
“Ka pasur vetëm rrahje me shkopinj. Osman Pana është dhunuar nga dy persona, të cilët janë identifikuar e shpallur në kërkim. Konflikti, për shkak të një ndërtimi në katin e dytë. Biznesmeni po hapte dritare në banesën e tij, por kjo gjë nuk u pranua nga fqinji i biznesmenit”, thotë Policia.
