Një specialist i teknologjisë në Policinë e Lezhës ka deklaruar, sot në gjyqin ndaj deputetit të PS-së, Armando Prega se kamerat e komisariatit kanë qenë të fikura në momentin e konfliktit.
Dëshmia e Rasim Bercajt, ka rrëzuar pretendimin e prokurorisë në gjyq. Sipas dëshmisë së tij në Gjykatën e Lartë, në komisariatin e Kurbinit ku pretendohet të ketë ndodhur përplasja mes deputetit Prenga dhe njërit prej pjesëtarëve të fisit Cali, janë 3 kamera, teknologji e vjetër, që regjistrojnë bardh e zi.
Por kur specialisti thotë se ka shkuar në komisariat tre ditë pas ngjarjes, nënvizon se kamerat i ka gjetur të fikura. Kur ka pyetur, policët i kanë thënë se ato kamerat nuk punojnë, por vetë ai ka konstatuar se ato kanë qenë të hequra nga priza dhe jo të prishura. Njëra prej këtyre kamerave sheh nga dera e komisariatit, që do të thotë se ditën e konfliktit nuk ka regjistruar asgjë. Prokuroria deri më tani ka thënë se ditën e ngjarjes nuk kanë funksionuar kamerat në komisariat.
