Një çift të rinjsh, të dashuruar marrëzisht aq sa, për të siguruar disa para për të ardhmen e tyre, vranë një të moshuar, tashmë janë bërë armiqtë kryesorë të njëri-tjetrin në sallën e gjyqit.
Gjoana Hila dhe Erando Qatipi aktualisht po përballen në Gjykatën e Shkodrës, me akuzën e vrasjes së një të moshuare, më saktësisht gjyshen e vajzës, viktimën Angje Hila.
E akuzuar Gjoana jetonte prej vitesh në shtëpinë e viktimës dhe, së bashku me të dashurin e saj, Erandon, kanë menduar të vjedhin sendet me vlerë të të moshuarës dhe më pas të largoheshin pa i kuptuar njeri.
Pasditen e datës 25 Shkurt 2015, Gjoana dhe Erando janë takuar në lokalin e një hoteli në qendër të qytetit të Shkodrës, pak metra larg shtëpisë së gjyshes së vajzës. Ata kanë dalë së bashku, janë drejtuar për në shtëpinë e Angje Hilës dhe janë parë të dalin prej andej pas rreth 40 minutash.
Askush nuk ka kuptuar se në shtëpinë e Angje Hilës kishte ndodhur një krim, ku ajo vetë kishte vdekur nga asfiksia, e mbytur nëpërmjet bllokimit të rrugëve të frymëmarrjes me anën e një jastëku.
Prej asaj dite, ndërmjet dy të dashuruarve nisi një ftohje e madhe, aq sa në mesazhet ndërmjet tyre dallohej se gjërat nuk ishin aspak si më parë.
Të nesërmen e krimit, djali i të moshuarës, Andrea Hila, konstatoi i pari se nëna e tij, e cila qëndronte e vetme në atë banesë dhe herë pas here i bashkohej edhe Gjoana, nuk jetonte më.
Menjëherë, Andrea njofton familjarët se nëna e tyre kishte vdekur, ndoshta për arsye natyrale. Mesditën e datës 26 Shkurt, nga Italia mbërrin për ceremoninë mortore, djali tjetër i viktimës, Bernard Hila. Ky i fundit vëren disa shenja dhune në fytyrën dhe trupin e nënës. Gjithashtu, ai ka konstatuar se në duart e nënës së tij mungonin ora dhe unaza, të cilat ai vetë ia kishte dhuruar kohë më parë.
Ndërmjet familjarëve Hila nis një debat i ashpër mbi arsyet e vdekjes dhe emigranti Andrea i është drejtuar Policisë, duke raportuar dyshimin se e ëma e tij, e moshuara Angje Hila, është vrarë.
Efektivët e Policisë kanë nisur menjëherë verifikimin dhe ekspertizën, gjatë të cilave kanë konstatuar se dyshimet e Andrea Hilës duheshin verifikuar. Rasti iu raportua Prokurorisë së Shkodrës, e cila nisi hetimet për vrasjen e të moshuarës.
Andrea Hila, kallëzuesi, deklaron para grupit hetimor se dyshimet kryesore mbi vrasjen e të moshuarës, bien mbi mbesën e tij, vajzën e vëllait Nikolin, e cila jetonte me viktimën. Gjoana Hila jetonte prej vitesh me Angjen dhe kishte dijeni për sendet me vlerë që ishin në shtëpi. Ky dyshim forcohej më tepër, pasi u konstatua se hyrja në shtëpi ishte realizuar pa dhunë. Pra, autorët duhet të kishin pasur çelësin e shtëpisë. Grupi hetimor u përqëndrua tek hetimi i familjarëve, me objektiv kryesor Gjoana Hilën.
Prokuroria e Shkodrës nisi të rindërtonte ngjarjen, duke mbledhur të gjitha provat e mundshme të lëvizjes së Gjoana Hilës në orët e fundit para ngjarjes.
U sekuestruan pamjet filmike të një hoteli në qendër të qytetit, shumë pranë shtëpisë së viktimës. Në materialin video u konstatua se rreth orës 16:00 të datës 25.02.2015 e pandehura Gjoana Hila futet në lokalin e hotelit dhe pas disa sekondash vjen edhe i pandehuri Erando Qatipi.
Pas disa minutash, dalin së bashku. Rreth ores 17:05 minuta, dy te pandehurit lëvizin në drejtim të banesës së viktimës Angje Hila. Më tej, pas rreth 40 minutash, ata shfaqen sërish në pamjet filmike të kamerave të hotelit, por kësaj here lëvizjet e tyre janë të çoroditura.
Autoritetet hetimore, disa ditë pas kallëzimit, krijuan bindjen se Gjoana Hila dhe Erando Qatipi duhet të jenë autorët e vrasjes. Në bazë të të dhënave të deri atij momenti, policía arreston dy të dyshuarit, në bazë të urdhërit të Prokurorisë së Shkodrës.
Menjëherë pas arrestimit, misteri i krimit filloi të sqarohej. Gjoana ka pranuar të shpjegojë mekanizmin e vrasjes së gjyshes së saj, duke ia faturuar krimit të dashurit, Erando Qatipi.
Për Gjoanën, vrasjen e Angje Hila e ka kryer Erando Qatipi, në dijeni dhe prezencë të saj, ne banesën e gjyshes Angje Hila. Gjoana ka pohuar se vjedhjen e gjyshes së saj e kishin planifikuar bashkë me të dashurin e saj, Erando Qatipi, rreth një javë përpara ditës së ngjarjes.
Ndërsa i pandehuri tjetër, ndoshta për të mbrojtur deri në fund të dashurën dhe veten e tij, e mohon që ka qenë i pranishëm në momentin e ngjarjes dhe pretendon se nuk ka asnjë dijeni mbi ngjarjen.
